З такой заявай выступілавіцэ-сьпікер Савету Фэдэрацыі Расеі Сьвятлана Арлова.
У інтэрвію Інтэрфаксу спадарыня Арлова заявіла, што ў Савеце Фэдэрацыі не выключаюць далейшага пагаршэньня сытуацыі ў Беларусі, што можа прывесьці да зьвяржэньня прэзыдэнта Аляксандра Лукашэнкі сваім народам.
«Калі Лукашэнка ня зьменіць сваю пазыцыю і не зразумее, што трэба займацца не папулісцкімі заявамі, а заняцца ўшчыльную, сур’ёзным чынам, развіцьцём рынкавай эканомікі і рынкавых адносін, то прагноз для яго будзе вельмі дрэнны», — заявіла Сьвятлана Арлова, аналізуючы сытуацыю ў Беларусі.
Паводле яе слоў, нават пры ўсёй моцы беларускай дзяржаўнай прапагандысцкай машыны, калі людзям ня будзе чаго есьці і на зарплату ня будзе чаго купіць,
то «ніякае ваеннае становішча ня выратуе Лукашэнку».
«І яго лёс можа быць сумным. Дастаткова ўспомніць, што адбылося з Мубаракам у Эгіпце», — сказала яна.
На яе думку, адна з прычын крызісу ў Беларусі ў тым, што нацыянальная эканоміка тут не зазнала структурных зьмен:
«Крызіс у Беларусі, перш за ўсё, носіць сыстэмны характар. І, безумоўна, да яго падштурхнула папулісцкае рашэньне пра значнае падвышэньне заробкаў і пэнсій у канцы 2010 году», — сказала С. Арлова.
Па яе словах, бязь зьнешняга фінансаваньня ў выглядзе крэдытаў і даходаў ад прыватызацыі або інвэстыцый Беларусь будзе рухацца да эканамічнай стагнацыі і банкруцтва. «І колькі б крэдытаў Беларусі ні выдзяляла Расея, праблем гэта ня вырашыць, паколькі ўсе крэдыты вырашаюць толькі імгненныя задачы, але не вырашаюць задач стратэгічных, на пэрспэктыву», — сказала яна.
Пры гэтым Арлова падкрэсьліла, што ніхто і ніколі ня дасьць крэдытаў бясплатна. «Расейскі бок цалкам абгрунтавана ставіць пытаньне аб прадстаўленні крэдытаў у абмен на прыватызацыю беларускіх прадпрыемстваў», — падкрэсьліла яна. Пры гэтым яна назвала недапушчальнымі заявы А. Лукашэнкі на адрас расейскіх СМІ:
«З аднаго боку, Лукашэнка просіць крэдыты ў Расеі, а з другога — заяўляе пра тое, што расейскім СМІ будзе закрыты доступ у Беларусь».
Цяпер чытаюць
ЗША паведамілі, што вызваленне палітвязняў у Беларусі «адкладзенае на некаторы час»10
Каментары