Расія займела новую ядзерную «Булаву»

Выпрабаванні міжкантынентальнай балістычнай ракеты Р-30 «Булава» марскога базавання завяршыліся, і ракета цяпер будзе прынятая на ўзбраенне, заявіў прэзідэнт Расіі Дзмітрый Мядзведзеў.

23 снежня атамная падлодка «Юрый Даўгарукі» праекта 955, для якой і была створаная «Булава», зрабіла адначасовы пуск дзвюх ракет. Звычайна такі пуск завяршае выпрабаванні.

Мядзведзеў адзначыў, iто цыкл выпрабаванняў «праходзіў з пэўнымі праблемамі». Маецца на ўвазе цэлая серыя няўдалых пускаў. Ад чэрвеня 2004 года было праведзена 18 запускаў «Булавы». 11 з іх былі прызнаныя цалкам або часткова паспяховымі. Аварыя «Булавы» 9 снежня 2009 года прывяла да з’яўлення ў небе над Паўночнай Еўропай незразумелых агнёў, якія спачатку здзівілі метэаролагаў, астраномаў і нават вайскоўцаў.

«Булаву» сканструявалі ў Маскоўскім інстытуце цеплатэхнікі, які таксама распрацаваў наземныя цвёрдапаліўныя міжкантынентальныя балістычныя ракеты «Ярс» і «Таполя-М».

У сярэдзіне 2009 года спецыялісты выказвалі меркаванне, што ракету наогул не ўдасца давесці да вытворчасці, і меркавалі, што на падлодкі серыі 955 прыйдзецца ўсталёўваць ракету «Сінява».

Яна прынцыпова адрозніваецца ад «Булавы» тым, што абсталяваная вадкапаліўным рэактыўным рухавіком, а не цвёрдапаліўным.

Цвёрдапаліўныя («Булава», «Таполя-М» і «Ярс») менш ўразлівыя для сродкаў ПРА. Вадкапаліўныя — складаныя ў абслугоўванні і небяспечныя, бо запраўлены высокатаксічным палівам.

Менавіта гэтая асаблівасць прывяла да гібелі 3 кастрычніка 1986 г. падводнай лодкі К-219.

Спецыялісты, якія маюць дачыненне да расійскіх стратэгічных ядзерных сілаў, адзначаюць, што «Булава» не з’яўляецца паўнавартаснай альтэрнатывай вадкапаліўным ракетам.

Па-першае, з-за занадта малой адкідной вагі, а па-другое, у яе марскім варыянце, — з-за даволі вялікай колькасці няўдалых пускаў.

У жніўні 2011 стала вядома, што

ў Расіі распрацоўваецца новая марская балістычная ракета на вадкім паліве, якая прыйдзе на змену «Сіняве».

Дзяржаўны ракетны цэнтр імя Макеева, абвясціўшы аб гэтай распрацоўцы, згадаў яе назву — «Лайнер».

У канцы лістапада прэзідэнт Дзмітрый Мядзведзеў, робячы афіцыйную заяву аб тым, як Расія будзе рэагаваць на адсутнасць прагрэсу на перамовах з ЗША па пытанні проціракетнай абароны, сярод іншых мераў назваў і мадэрнізацыю стратэгічных ядзерных сілаў.

Эксперты лічаць, што Расія пачне ўкладааць больш сродкаў у распрацоўку новых міжкантынентальных балістычных ракет і іх мадэрнізацыю. На іх думку, гэта перш за ўсё тычыцца ракет «Ярс».

Іншыя эксперты таксама адзначаюць важнасць будаўніцтва менавіта цвёрдапаліўных ракет, як менш уразлівых на пачатковым этапе траекторыі палёту.

• 0
• 0
• 0
• 0
• 0
• 0
• 0
• 0