Як паведаміў супрацоўнік аддзела інфармацыі і грамадскіх сувязей гомельскага УУС Ігар Грышкевіч, 24 сакавіка мужчына прадаў на рынку аўтамабіль грамадзянам Расіі, а праз некалькі гадзін выявіў, што грашовая выручка — 8,6 тыс. долараў — знікла.
Паводле слоў Грышкевіча, для падстрахоўкі пры продажы прысутнічаў сябар прадаўца аўтамабіля. Аформіўшы дакументы, пералічыўшы грошы, яны папрасілі новых гаспадароў аўто давезці іх да месца жыхарства. Развітаўшыся з расіянамі, прадаўцы зайшлі ў магазін, а затым адправіліся на кватэру да аднаго з іх адзначаць паспяховую здзелку.
Толькі ў канцы дня мужчына выявіў, што грошы зніклі. Удвух з сябрам яны абшукалі кватэру, у якой адзначалі продаж, а таксама звярнуліся ў магазін, дзе затаварваліся, аднак грошай нідзе не было. Пасля гэтага мужчына звярнуўся ў міліцыю.
Праваахоўнікі правяралі відэазапісы з камер назірання ў магазіне, а таксама дапыталі сябра прадаўца. Абодвух нават праверылі на дэтэктары хлусні, які пацвердзіў, што яны кажуць праўду.
Праз натарыяльную кантору супрацоўнікі міліцыі ўстанавілі асобы расіян і звязаліся з расійскімі калегамі з Бранскай вобласці. Ужо праз некалькі гадзін прыйшло паведамленне, што грошы знайшліся:
у эйфарыі пакупнік проста паклаў пакет з доларамі ў свой толькі што прададзены аўтамабіль.
«27 сакавіка расіяне прывезлі ўсю суму і перадалі яе гамяльчаніну, для якога нарэшце закончыліся бяссоныя ночы, а для дзясятка супрацоўнікаў міліцыі — штодзённыя пошукі. Крымінальная справа так і не была распачата, бо расіяне добраахвотна аддалі грошы і не спрабавалі іх прысвоіць», — дадаў супрацоўнік аддзела.
Алена Германовіч, БелаПАН.
Амаль усе чаты і суполкі калоній і СІЗА Беларусі прызналі экстрэмісцкімі фармаваннямі. Пад пагрозай тысячы чалавек5
Каментары