Міжнародныя праваабаронцы патрабуюць неадкладнага вызвалення і лячэння Сяргея Каваленкі

Міжнародная федэрацыя правоў чалавека (МФПЧ) заклікае ўлады Беларусі неадкладна спыніць палітычны пераслед актывіста Кансерватыўна-хрысціянскай партыі — БНФ Сяргея Каваленкі, які трымае галадоўку, і забяспечыць яму неабходную медыцынскую дапамогу.

У сваёй заяве праваабаронцы нагадваюць, што крымінальны пераслед апазіцыянера пачаўся пасля таго, як 7 студзеня 2010 года ён вывесіў на галоўнай навагодняй ёлцы Віцебска нацыянальны бел-чырвона-белы сцяг. За гэта Каваленку асудзілі, прызналі вінаватым па двух артыкулах Крымінальнага кодэкса (наўмысныя дзеянні, якія груба парушаюць грамадскі парадак і насілле ў дачыненні да супрацоўніка праваахоўных органаў пры выкананні ім службовых абавязкаў) і прыгаварылі да трох гадоў абмежавання волі. У лютым гэтага года апазіцыянера абвінавацілі ва ўхіленні ад адбывання пакарання і асудзілі на 2 гады і 1 месяц пазбаўлення волі.

«Публічная дэманстрацыя і вывешванне Каваленкам сцягу ні ў якім выпадку не можа кваліфікавацца як хуліганскія дзеянні — яны з’яўляюцца грамадска-палітычнай акцыяй, не носяць характару асаблівага цынізму і яўнай непавагі да грамадства і не маюць гэтага на ўвазе»,

Паўторнае прыцягненне Каваленкі да крымінальнай адказнасці «за нібыта ўхіленне ад адбывання пакарання» праваабаронцы расцэньваюць як «непрыкрыты працяг палітычных рэпрэсій» і «спробу далейшай ізаляцыі актывіста апазіцыйнай партыі».

Асаблівую занепакоенасць МФПЧ выклікае цяперашні стан здароўя Сяргея Каваленкі, які аб’явіў галадоўку адразу пасля свайго арышту 19 снежня 2011 года. «Стан яго здароўя крытычны. МФПЧ выказвае апасенне за яго жыццё, а таксама сур’ёзную занепакоенасць магчымым прымяненнем да яго прымусовага псіхіятрычнага лячэння», — сказана ў заяве.

МФПЧ заклікае беларускія ўлады «неадкладна і безагаворачна вызваліць Каваленку, спыніць яго крымінальны пераслед і забяспечыць яму неабходную і неадкладную медыцынскую дапамогу ў кваліфікаванай медыцынскай установе адкрытага тыпу».

«Адказнасць за жыццё і здароўе Каваленкі поўнасцю ляжыць на кіраўніцтве Міністэрства ўнутраных спраў Беларусі, у распараджэнні якога ён зараз знаходзіцца», — падкрэсліваюць праваабаронцы.

Нагадаем, Сяргей Каваленка зараз знаходзіцца ў псіхіятрычным аддзяленні на тэрыторыі папраўчай калоніі «Віцьба-3». 2 красавіка стала вядома, што яго прымусова кормяць праз зонд. Паводле слоў жонкі апазіцыянера, прымусовае кармленне пачалося 1 красавіка. Да шасці разоў на дзень Каваленку ўліваюць дзіцячую малочную сумесь «Беллакт», а таксама працягваюць ставіць кропельніцы з глюкозай, амінакіслотамі і вітамінамі. Падчас галадоўкі актывіст апазіцыі, які раней важыў каля 83 кілаграмаў, страціў амаль палову сваёй вагі.

• 0
• 0
• 0
• 0
• 0
• 0
• 0
• 0