У парламент унесеныя папраўкі ў закон аб рэспубліканскіх і мясцовых сходах
У палату прадстаўнікоў унесены папраўкі ў закон «Аб рэспубліканскіх і мясцовых сходах». Гэтая інфармацыя размешчана на сайце ніжняй палаты беларускага парламента.
У параўнанні з законам, прынятым у 2000 годзе, у дакуменце (яго праект размешчаны на сайце pravo.by) значна пашыраецца раздзел, які рэгламентуе правядзенне мясцовых сходаў. Колькасць артыкулаў у ім пашырана з чатырох да адзінаццаці.
У прыватнасці, дабаўлены артыкулы «спыненне мясцовага сходу», «асобы, адказныя за падрыхтоўку і правядзенне мясцовага сходу, члены ініцыятыўнай групы» і іншыя.
Таксама ў законапраекце ёсць новы раздзел «Адказнасць за парушэнне заканадаўства аб рэспубліканскіх і мясцовых сходах».
Неабходна адзначыць, што апазіцыйны палітык Віктар Івашкевіч з’яўляўся ініцыятарам правядзення мерапрыемстваў у форме мясцовых сходаў. Так, акцыі «Народны сход» прайшлі 8 кастрычніка і 12 лістапада. У кастрычніку акцыя адбылася прыкладна ў дзесяці гарадах Беларусі, у лістападзе — толькі ў трох.
Улады не згадзіліся з довадамі ініцыятараў акцыі аб тым, што «Народныя сходы» трапляюць пад закон аб рэспубліканскіх і мясцовых сходах. Сустаршыняў аргкамітэта — Віктара Івашкевіча і Генадзя Фядыніча — Генпракуратура папярэдзіла аб незаконнасці правядзення акцыі.
Восенню 2011 года парламент Беларусі прыняў папраўкі ў закон «Аб масавых мерапрыемствах у Рэспубліцы Беларусь», якія ўскладнілі парадак іх правядзення.
«Яна даўнавата ў Беларусі». Бацька Анжалікі Мельнікавай прызнаўся, што яна жывая і здаровая90
Каментары