Супрацоўнікамі Ленінскага РУУС Мінска затрымана19-гадовая мінчанка, якая спрабавала стварыць фінансавую піраміду.
Як паведамілі ў ГУУС Мінгарвыканкама, у верасні 2011 года дзяўчына аформілася ў якасці індывідуальнага прадпрымальніка і размясціла аб’яву ў інтэрнэце аб аказанні паслуг па продажы будаўнічых блокаў.
Паколькі цана на будматэрыялы была значна ніжэйшай, чым у канкурэнтаў, кліенты знайшліся хутка. Узяўшы з першых заказчыкаў грошы па перадаплаце, зламысніца ў наступных аб’явах павышала цану за тавар і з новых кліентаў брала грошы ўжо па павышанай цане. З гэтых грошай яна вяртала першым кліентам іх суму, а рэшткі пакідала сабе.
Неўзабаве дзяўчына прыняла да сябе на працу яшчэ двух чалавек. Аднак вясной гэтага года недахоп заказчыкаў прывёў да таго, што прадпрымальніца не змагла вярнуць грошы апошнім кліентам. Менавіта яны і звярнуліся ў міліцыю з заявай.
Цяпер незаконная дзейнасць прадпрымальніцы прыпынена. У дачыненні да дзяўчыны распачата крымінальная справа за махлярства.
Каментары