У Мінску з азнаямленчым візітам знаходзіцца новы кіраўнік місіі Міжнароднага валютнага фонду, эканаміст еўрапейскага дэпартамента МВФ Давід Хофман.
Сёння раніцай ён сустрэўся з прэм`ер-міністрам Міхаілам Мясніковічам, які заявіў пра зацікаўленасць Беларусі ў новай праграме супрацоўніцтва з МВФ.
Вясной гэтага года Мінск у сувязі з заканчэннем тэрміну сваіх паўнамоцтваў пакінулі ранейшы кіраўнік місіі фонду Крыс Джарвіс і пастаянны прадстаўнік МВФ у Беларусі Наталля Калядзіна.
Фонд заявіў, што пакуль не плануе накіроўваць у Беларусь новага пастаяннага прадстаўніка. Пытанне пра яго прызначэнне будзе разгледжана ў тым выпадку, калі фонд і беларускія ўлады будуць блізкія да падпісання новай крэдытнай праграмы, гаварылася ў паведамленні МВФ.
Трэба адзначыць, што пасада пастаяннага прадстаўніка МВФ у Беларусі ўжо скасоўвалася ў 2005 годзе ў сувязі з неадпаведнасцю эканамічнай палітыкі ўрада рэкамендацыям фонду і пасля таго, як беларускія ўлады заявілі пра адсутнасць неабходнасці ў прыцягненні крэдытных рэсурсаў МВФ. Да канца 2008 года супрацоўніцтва Беларусі з МВФ было сканцэнтравана на атрыманні тэхнічнай дапамогі і кансультацый.
У 2009 годзе ў Мінск у якасці пастаяннага прадстаўніка фонду прыехала Наталля Калядзіна — пасля таго як бакі дамовіліся аб праграме супрацоўніцтва stand-by.Першапачаткова праграма прадугледжвала выдзяленне Беларусі крэдыту на 2,45 млрд. долараў, аднак затым МВФ павялічыў фінансаванне да 3,46 млрд. Крэдыт Беларусь атрымлівала пяццю траншамі на працягу 2009—2010 гадоў.
Вясной гэтага года Беларусь накіравала ў МВФ заяўку на атрыманне чарговага крэдыту. Мінск разлічваў атрымаць 3,5 млрд. долараў для рэфінансавання старога доўгу перад фондам. У адказ прадстаўнікі МВФ заявілі, што ўмовай пачатку перамоў павінна стаць гатоўнасць краіны да "глыбокіх структурных рэформ".
Цяпер чытаюць
На пратэстанцкі фестываль у «Чыжоўку-Арэну» едзе амерыканскі прапаведнік Франклін Грэм. Разам з ім чакаюць Коўла з жонкай14
Каментары