З «Юнівест-М» вывелі нафтавыя таксіны

Бізнесмен Анатоль Тарнаўскі паследаваў прыкладу сваіх калегаў па еўрасаюзным няшчасці Уладзіміры Пефціева і Юрыі Чыжа і вывеў з публічнай сферы нафтавыя актывы. На сайце кампаніі «Юнівест-М» у раздзеле «бізнес-сферы» больш не значыцца "нафтаперапрацоўка"

Аднак, як удалося высветліць, дэ-факта акцыянеры кампаніі працягваюць займацца рэалізацыяй беларускіх нафтапрадуктаў.

«Юнівест-М» у 2001 г. стварылі выхадцы з «Слаўнафты» на чале з Анатолем Тарнаўскім. Кампанія займалася перапрацоўкай расійскай нафты на беларускіх НПЗ і далейшым продажам нафтапрадуктаў.

Большы ўпор быў зроблены на Мазырскі НПЗ, дзе «Слаўнафта» была акцыянерам. Неўзабаве Беларусь стала «нафтавым афшорам», а «Юнівест-М» стаў адным з найбуйнейшых нафтатрэйдараў. Асабліва добра ішоў экспарт нафтапрадуктаў у Еўропу.

Атрымаўшы значны нафтавы прыбытак, «Юнівест-М» у 2007 г. прыняў рашэнне дыверсіфікаваць бізнэс і ў імгненне вока стаў адным з буйных беларускіх дэвелапераў, актыўна інвестуючы ў будаўніцтва жылой і камерцыйнай нерухомасці.

Зараз групе кампаній «Юнівест-М» належаць наступныя аб’екты: міні-поліс «Каскад», гасцініца ў Жлобіне, бізнес-цэнтры ў Мінску, установы грамадскага харчавання і Смалявіцкі завод жалеза-бетонных вырабаў.

Шэраг дэвелаперскіх праектаў рэалізуецца пад маркай кампаніі «Юнівестбудінвест», заснавальнікамі якой, па наяўнай інфармацыі, акрамя «Юнівест-М» з’яўляюцца структуры, блізкія да Прэзідэнцкага спартыўнага клуба, які ўзначальвае Дзмітрый Лукашэнка.

23 сакавіка 2012 года міністры замежных спраў 27 краін ЕС пагадзіліся на ўвядзенне санкцый у дачыненні да 12 чалавек і 29 кампаній з Беларусі, чый уезд у ЕС забаронены і чые актывы на яго тэрыторыі павінны быць замарожаныя. У чорным спісе апынуўся Анатоль Тарнаўскі і тры яго кампаніі («Юнівест-М», «Юніс Ойл», «Юнівестбудінвест»).

У ЕС Тарнаўскага называюць «адным з кашалькоў рэжыму Лукашэнкі».

Дзейнасць згаданых кампаній пераважна засяроджаная ў Беларусі.

Адзінае, што звязвала іх з Еўропай, гэта нафтапрадукты, якія экспартаваліся ў ЕС.

Крыніца ў нафтавай сферы пацвярджае, што «Юнівест-М» у апошні час быў не гэтак актыўны [у нафтаперапрацоўцы], як раней. Цяпер у іх, кажуць, адкрылася другое дыханне. Зрэшты, як ва ўсіх».

Некалькі месяцаў таму з’явілася інфармацыя, што «Юнівест-М» значыцца сярод пастаўшчыкоў біядызельнага паліва ва Украіну. У гэты ж момант актывізаваў сваю дзейнасць і мясцовы трэйдар «Славянскія нафтапрадукты», праз якога раней «Слаўнафта» вяла бізнэс ва Украіне. Крыніца на ўкраінскім нафтавым рынку пацвярджае, што «за ўсімі гэтымі структурамі стаяць выхадцы „Слаўнафты“, яны рэалізуюць нафтапрадукты вытворчасці Мазырскага НПЗ». Крыніца не выключыла, што «адраджэнне найстарэйшага ўкраінскага нафтатрэйдара» звязана з санкцыямі ЕС у Беларусі.

Варта таксама адзначыць, што «Юнівест-М» і яго «дачка» «Юніс Ойл» маюць ліцэнзію «Белнафтахіма» на аптовы гандаль беларускімі і імпартнымі нафтапрадуктамі.

Крыніца з усмешкай на твары кажа, што «нафтавікі, як і чэкісты, былымі не бываюць».

• 0
• 0
• 0
• 0
• 0
• 0
• 0
• 0