Aŭtar, Źmicier Kustoŭski, daść aŭtohrafy.
4 śniežnia adbudziecca prezientacyja knihi Źmitra Kustoŭskaha «Prytułak»
4 śniežnia aŭtar ramana Źmicier Kustoŭski padčas prezientacyi svajoj debiutnaj knihi «Prytułak» adkaža na pytańni čytačoŭ i padpiša žadajučym svaje knihi.
Akramia Źmitra na prezientacyi vystupiać Pavieł Darochin, aŭtar vokładki knihi, piśmieńnik Kirył Stasielka i Fiodar Žyvaleŭski, salist hurtu «Hołaja Manaška», jaki praśpiavaje niekalki pieśniaŭ.
Impreza projdzie ŭ 19:00 u Art Siadzibie (Mašerava, 18).
Napiaredadni prezientacyi vydaviectva «Halijafy» zadała Źmitru niekalki pytańniaŭ pra jahony tvor.
Źmicier, raspaviadzicie našym čytačam pra što vaša kniha?
Pra maładoha chłopca-ramantyka Aleha, jaki kidaje ŭsio i źjazdžaje ŭ pošukach lepšaha za miažu. Hieroja čakaje ciažkaja daroha, jakuju treba prajści, kab zrazumieć samoha siabie.
U peŭnym sensie «Prytułak» — heta padarožža ŭ Jeŭropu, z pryhodami i sapraŭdnym adrenalinam. Taksama heta historyja kachańnia, niaščasnaha kachańnia, jakoje časta i prymušaje hieroja rabić nieabdumanyja kroki.
Hałoŭnyja padziei knihi razhortvajucca ŭ 2011-2012 hadach.
Ci možna ličyć vaš raman aŭtabijahrafičnym? Vy ž taksama, jak i vaš hieroj, pierajechali ŭ Varšavu ŭ 2011 hodzie.
U niejkaj miery raman aŭtabijahrafičny, ale nie całkam.
Pry stvareńni amal kožnaha z hierojaŭ ja ŭjaŭlaŭ kankretnuju asobu. Niekatoryja vobrazy ludziej, scen, miescaŭ — całkam realnyja i prosta pieraniesienyja na papieru. Ale jość i tyja vobrazy, jakija pryjšłosia dapracavać, dašlifavać, kab pakazać admietnyja rysy kankretnych ludziej, kab u čytača nie było sumnievaŭ adnosna charaktaru piersanažaŭ.
Toje ž tyčycca i hałoŭnaha hieroja, na stvareńnie vobrazu jakoha mianie natchniŭ kankretny čałaviek, avanturny i biezadkazny, ale adnačasova z tym cikaŭny, žyvy dy nieabyjakavy.
Nu i ŭ toj ža čas hałoŭny hieroj — heta ja sam sa svaimi pošukami i vahańniami ŭ toj pieryjad, kali stvaraŭsia raman (2011-2012).
«Prytułak» — vaša debiutnaja kniha. Ci jość žadańnie praciahvać pisać dalej?
Što tyčycca dalejšych tvorčych płanaŭ, to pracy nad novym tvoram ja jašče nie pačynaŭ, ale ŭ majoj hałavie ŭžo pačaŭ śpieć novy siužet. I ja by chacieŭ praciahnuć pisać.
A zaraz mnie cikava nazirać, ci zažyvie maja debiutnaja kniha svaim žyćciom. Ci zakranie čytača? Ci stanie jana pačatkam niejkaha abmierkavańnia?
Kamientary