Heta ban-palityka i praviły supołki «Fieminizm. Biełaruś». Zirnicie, za što karystalniki «Ukantakcie» mohuć trapić u niamiłaść administrataraŭ.
Pieršaje — seksizm
Pa-anhlijsku — sexism, ad łacinskaha sexus — poł
Pakolki hety termin apošnim časam užyvajecca skroź, zbolšaha ŭžo zrazumieły — dyskryminacyja pa pałavoj prykmiecie. Ale treba zaznačyć, u kožnaha svajo mierkavańnie nakont taho, što źjaŭlajecca, a što nie źjaŭlajecca hetaj samaj dyskryminacyjaj. Adzin bačyć seksizm na rekłamnym baniery, dzie na kanapie mužčyna siadzić vyšej, a žančyna — nižej. Maŭlaŭ, daminuje. A inšy nie bačyć seksizmu ŭ tym, što ŭ Halivudzie mužčyny-zorki zarablajuć udvaja bolš za žančyn.
Druhoje — mizahInija
Ad staražytnahreckich μῖσος — nianaviść i γυνή — žančyna
Kali kazać prosta, to heta ahulnaja nianaviść da žančyn, paharda, jakaja hruntujecca vyklučna na pałavoj prykmiecie. Kali chtości abvinavačvaje ŭsich žančyn biez razboru ŭ lehkadumnaści, chitraści, adstałaści i hetak dalej — heta možna ličyć mizahinijaj. Kali ž abvinavačvańni tyčacca niejkaj kankretnaj asoby, to heta ŭžo ničoha ahulnaha ź mizahinijaj nie maje.
Treciaje — mudražanockaść
Ustanoŭki dla žančyn kštałtu «budź dobraj haspadyniaj», «budź seksualnaj», «budź ścipłaj», «budź dobraj maci», «budź zahadkavaj», «budź biezabaronnaj», «budź pasłuchmianaj» i dalej u tym ža duchu — heta i jość mudražanockaść. To bok stereatypnaje ŭsprymańnie «idealnaj» žančyny.
Čaćviortaje — łukizm
Abo pa-anhlijsku face fascism
Moža być, vy zaŭvažali, što da ludziej, źniešnaść jakich ličycca pryhožaj, pryvabnaj, časam pa-inšamu staviacca, čym da tych, chto nie ŭpisvajecca ŭ «standarty», prydumanyja hramadstvam? Heta i jość łukizm. Kali kazać prosta — niepraŭdzivaja, nieadekvatnaja acenka čałavieka, zroblenaja pad upłyvam jaho źniešnaści.
Piataje — vikcimbłejminh
Ad łacinskaha victima — achviara i anhlijskaha blaming — vinavacić
Kali achviaru napadu, padmanu ci inšaj niepryjemnaj situacyi ličać u hetym i vinavataj. Naprykład, časta čujuć «sama vinavataja» ci «sam vinavaty» achviary seksualnaha hvałtu ci damahalnictvaŭ. Asabliva žančyny, jakim vystaŭlajuć pretenzii kštałtu: nie tak apranułasia, nie tak siabie pavodziła, nie tudy hladzieła i hetak dalej.
Pamiatajecie historyju Dzijany Šuryhinaj, jakuju abmiarkoŭvaŭ uvieś rasijski internet? Voś tut jakraz pra heta.
Šostaje — słatšejminh
Ad anhlijskaha slut — šlucha i shame — hańba
Kali pryvabnuju, pryhoža apranutuju dziaŭčynu nazyvajuć raspuśnicaj tolki tamu, što jana seksualnaja ci lubić kłuby i dyskateki. Pryčym realnaja kolkaść pałavych partnioraŭ tut uvohule nie maje značeńnia.
Siomaje — ejdžyzm
Pa-anhłijsku ageism, ad słova age — uzrost
Heta dyskryminacyja pa ŭzroście. Pryčym ejdžyzm moža raspaŭsiudžvacca jak na sacyjalnyja śfiery, tak i na asabistyja. Najbolš cierpiać ad hetaj dyskryminacyi pažyłyja ludzi, ale pačynajuć uźnikać niepryjemnyja situacyi najčaściej paśla 45 hod.
My pryviali, ad jakich słovaŭ pachodziać hetyja paniaćci, dla taho, kab vy mahli prapanavać biełaruskija anałahi. Ci jość u vas idei?
***
Kamientary