Sotni tysiač ludziej u centry Jerevana śviatkavali sychod Sarhsiana VIDEA. Što skazaŭ Pašynian
Były prezident, a paśla premjer-ministr Armienii Sierž Sarhsian siońnia padaŭ u adstaŭku pad ciskam demanstracyj i strajkaŭ. Navina pra sychod niaźmiennaha kiraŭnika krainy vyklikała ejfaryju ŭ žycharoŭ Jerevana.
Na centralnaj płoščy horada sabraŭsia šmattysiačny mitynh. Ludzi tancavali, słuchali lidaraŭ apazicyi i navat smažyli šašłyki. Voś videastrym:
Lidar apazicyjnaha ruchu «Vyjście» Nikoł Pašynian z trybuny mitynhu zaklikaŭ pravieści daterminovyja parłamienckija vybary i raskazaŭ pra padziei apošniaha dnia, kali jaho spačatku aryštavali supracoŭniki armianskaj dziaržbiaśpieki, a paśla da jaho ŭ turmu prybyli vysokapastaŭlenyja asoby z kiraŭnictva krainy na pieramovy.
Pašynian padkreśliŭ, što ŭ armianskaj aksamitnaj, biaskroŭnaj revalucyi niama nijakaha hieapalityčnaha kantekstu.
Armienija abapirajecca na Rasiju, budučy atočanaja z troch bakoŭ musulmanskimi krainami i znachodziačysia ŭ stanie faktyčnaj vajny z Azierbajdžanam, blizkim sajuźnikam Turcyi.
Apazicyja zapatrabavała pryznačeńnia novaha časovaha ŭrada na čas da daterminovych vybaraŭ. Na dumku Pašyniana, vybary novaha premjer-ministra pavinny adbycca «na praciahu tydnia»
Što tyčycca daterminovych parłamienckich vybaraŭ, to, zhodna z Pašynianam, jany pavinny być praviedzieny ŭ «samyja karotkija łahičnyja terminy».
ZŠA zajavili pra hatoŭnaść pracavać z novym uradam.
U sieradu, 25 krasavika, praciahnucca pieramovy «vakoł mirnaj pieradačy ŭłady ŭ Armienii» z vykonvajučym abaviazki premjer-ministra Karenam Karapiecianam.
Jon taksama paviedamiŭ, što z Karenam Karapiecianam u jaho jość vyraznaja damoŭlenaść ab tym, što ŭsie zatrymanyja i aryštavanyja padčas akcyj pratestu pavinny być nieadkładna, «da kanca siońniašniaha dnia, da kanca hetaha mitynhu», vyzvalenyja.
Rasijskija ŚMI pra padziei ŭ Jerevanie paviedamlajuć minimalna.
Kamientary