Vypiłoŭvali zamok, zalacieŭ AMAP sa zbrojaj: jak siłaviki pryjšli da śviedki z pytańniami pra padpisku na telehram-kanał
9 śniežnia da mahiloŭskaj aktyvistki i šmathadovaha čalca BSDP (Hramada) Volhi Kułažynaj pryjšli siłaviki. Skončyłasia ŭsio pahromam u kvatery i pajezdkaj u Śledčy kamitet. Admietna, što Volha nie padazravanaja pa niejkaj spravie i nie abvinavačanaja, da jaje pryjšli jak da śviedki.
Volha raskazvaje: «Usio jak va ŭsich: pačali hrukacca ŭ dźviery, paśla niešta piłavali, zamok, jak ja zrazumieła.
Ja adčyniła dźviery. Zalacieli try amapaŭcy sa zbrojaj, ź imi dva z HUBAZiK i troje paniatych. Mianie prypiorli da ściany, pravieryli, što bolš u chacie nikoha niama.
Paśla pakazali pastanovu. U joj było skazana, što ja śviedka pa kryminalnaj spravie ab padpiskach na niejki telehram-kanał, pryznany ekstremisckim.
Paśla byŭ pieratrus. Tupa padychodziŭ adzin čałaviek, pačynajučy z kuchni, braŭ krupu, muku, vysypaŭ na padłohu. Razarvaŭ i vysypaŭ dva pakiety z kormam dla katoŭ. Abłaziŭ plitu, šafu. Ja ŭbačyła hety pahrom, razzłavałasia, kinuła pakiet ź siemkami, kažu: «A što vy tut nie pravieryli, moža tam taksama zbroja schavanaja?»
Tady jany vyrašyli, što ja ahresiŭnaja, zaviali mnie ruki za śpinu i nadzieli kajdanki. Kali ŭsie pakoi pieravarušyli, ź mianie źniali kajdanki i pavieźli ŭ HUBAZiK. U mianie ničoha nie było, telefona, techniki, adpaviedna, ničoha nie zabrali. Tam ja padpisała niejkuju papieru, što ŭ mianie ničoha nie zabrali, zatym pavieźli ŭ Śledčy kamitet.
Tam było dvoje śledčych. Adzin, jaki vydaŭ pastanovu na pieratrus, mieŭ pytańnie: ci źjaŭlajusia ja padpisčykam ekstremisckaha telehram-kanała? Ja patłumačyła, što nie maju nijakaha dačynieńnia da telehram-kanałaŭ.
U druhoha było pytańnie pa staroj spravie, jašče ź minułaha hoda, tam ja taksama prachodziła śviedkaj. Detali skazać nie mahu, ja dała padpisku ab nierazhałošvańni.
U vyniku jany sa mnoju pahavaryli i mianie prosta adpuścili. Nichto pierada mnoju nie vybačaŭsia, darečy. Čamu jany zalacieli tak žorstka da mianie, ja nie viedaju.
Moža, heta była pomsta za toje, što ja ŭ paniadziełak dźviery nie adčyniła? Bo ŭ paniadziełak da mianie łamilisia, hrukali ŭ dźviery — ale ja nie adčyniała. Nu i raniej mianie vyklikali da śledčych, ale ja ihnaravała i prosta nie prychodziła.
Ci moža heta było zroblena prosta pakazalna, kab zapałochać, kab nie dumała pra palityku. Ci prosta kab zapomniła nadoŭha našych supracoŭnikaŭ milicyi».
Kamientary