Dźvie traciny ludziej z atłuścieńniem «toŭstyja, ale zdarovyja». Navukoŭcy prosiać daktaroŭ hladzieć nie tolki na indeks masy cieła

Zvyčajna, kab vyznačyć, ci jość u čałavieka atłuścieńnie, dastatkova viedać jaho rost i vahu. Na ich asnovie raźličvajuć indeks masy cieła (IMC), i kali jon dasiahaje 30, čałavieku staviać adpaviedny dyjahnaz. Ale hety pakazčyk nie ŭličvaje, kolki ŭ arhaniźmie tłušču, dzie jon nazapašvajecca i ci ŭpłyvaje na zdaroŭje.

U vyniku dva čałavieki z adnolkavym IMC mohuć mieć zusim rozny stan zdaroŭja. Adzin pakutuje ad parušeńniaŭ pracy ŭnutranych orhanaŭ, a druhi nie maje prykmiet takich prablem. Bolš za toje, u čałavieka z raźvitymi myšcami IMC moža być vysokim navat bieź lišku tłušču. A ŭ čałavieka z narmalnym IMC mohuć nazapašvacca niebiaśpiečnyja tłuščavyja adkłady vakoł unutranych orhanaŭ.

Nakolki istotnyja niedachopy takoj dyjahnostyki, pakazała novaje daśledavańnie brytanskich navukoŭcaŭ, pra jakoje piša The Telegraph. Vyśvietliłasia, što amal 70% ludziej, jakich pavodle IMC adnosiać da katehoryi z atłuścieńniem, nie majuć vyjaŭlenych parušeńniaŭ pracy arhanizma, źviazanych ź liškam tłušču.

Čym prapanujuć zamianić zvykły padychod

U 2025 hodzie mižnarodnaja kamisija ekśpiertaŭ prapanavała pierahledzieć padychod da dyjahnostyki atłuścieńnia. Śpiecyjalisty zaklikali ŭličvać nie tolki IMC, ale i kolkaść tłušču ŭ arhaniźmie, jaho raźmierkavańnie, pracu ŭnutranych orhanaŭ i toje, nakolki vaha abmiažoŭvaje paŭsiadzionnaje žyćcio čałavieka.

Pry takim padychodzie vyłučajuć dva vidy atłuścieńnia. Kliničnaje atłuścieńnie dyjahnastujuć, kali lišak tłušču ŭžo parušaje pracu orhanaŭ abo istotna abmiažoŭvaje fizičnyja mahčymaści. Heta moža prajaŭlacca, naprykład, ciažkaściami z dychańniem, sardečnaj niedastatkovaściu abo prablemami z ruchomaściu sustavaŭ.

Dakliničnaje atłuścieńnie aznačaje, što lišak tłušču jość, ale źviazanych ź im parušeńniaŭ pracy arhanizma pakul nie vyjavili. Taki stan nie ličycca całkam biaśpiečnym, bo ryzyka raźvićcia chvarob u budučyni zachoŭvajecca. Adnak čałavieku nie abaviazkova patrebnaje takoje ž lačeńnie, jak tamu, u kaho atłuścieńnie ŭžo vyklikała ŭskładnieńni.

Pavialičyć

Navukoŭcy z Univiersiteckaha kaledža Łondana vyrašyli pravieryć, nakolki novaja kłasifikacyja źmianiaje ŭjaŭleńnie pra raspaŭsiudžanaść atłuścieńnia i źviazanyja ź im ryzyki.

Dla hetaha jany praanalizavali źviestki 6978 brytancaŭ va ŭzroście 46 hadoŭ, jakija ŭdzielničali ŭ doŭhaterminovym daśledavańni zdaroŭja. Kožnaha ŭdzielnika acanili pavodle zvyčajnaha IMC i novych kryteryjaŭ.

Vyniki akazalisia pakazalnymi. Siarod ludziej ź IMC 30 i vyšej tolki 31,4% adpaviadali kryteryjam kliničnaha atłuścieńnia. Astatnija 68,6% mieli dakliničnaje atłuścieńnie, heta značyć, u ich nie vyjavili parušeńniaŭ pracy orhanaŭ abo fizičnych abmiežavańniaŭ, jakija daśledčyki źviazvali ź liškam tłušču.

Vyjaviłasia i advarotnaja prablema. Prykmiety kliničnaha atłuścieńnia mieli 16,6% ludziej z zališniaj vahoj (IMC ad 25 da 29,9), jakich pavodle tradycyjnych kryteryjaŭ jašče nie adnosili da ludziej z atłuścieńniem. Bolš za toje, takija prykmiety vyjavili navat u 4% udzielnikaŭ z narmalnym IMC.

Takim čynam, aryjentacyja tolki na IMC moža nie tolki pierabolšvać prablemy adnych ludziej, ale i nie zaŭvažać ich u inšych.

Chto sapraŭdy ryzykuje zdaroŭjem

Daśledčyki taksama praanalizavali śmiarotnaść udzielnikaŭ na praciahu nastupnych piaci hadoŭ, kab pravieryć, jaki padychod lepš vyjaŭlaje ludziej z pavyšanaj ryzykaj.

Siarod ludziej z kliničnym atłuścieńniem imaviernaść śmierci akazałasia prykładna ŭ piać razoŭ vyšejšaj, čym siarod udzielnikaŭ biez atłuścieńnia. Pry dakliničnym atłuścieńni navukoŭcy taksama nazirali pavyšeńnie ryzyki, ale statystyčnaj upeŭnienaści ŭ hetym vyniku nie atrymali.

Pry hetym zvyčajnyja katehoryi IMC nie pakazali nastolki vyraznaj suviazi sa śmiarotnaściu. Adnak aŭtary zaklikajuć aściarožna interpretavać hetyja ličby. Za piać hadoŭ pamierli tolki 27 udzielnikaŭ daśledavańnia, tamu vysnovy pra ryzyku śmierci patrabujuć paćviardžeńnia na bolšaj kolkaści ludziej.

Jak davodziać navukoŭcy, admova ad aryjentacyi vyklučna na IMC dazvolić lepš adroźnivać ludziej, jakija sapraŭdy majuć prablemy sa zdaroŭjem, ad tych, čyj vysoki pakazčyk źviazany z asablivaściami ciełaskładu.

Heta važna i dla sistemy achovy zdaroŭja. Bolš dakładnaja dyjahnostyka dapamoža vyznačyć, kamu nieabchodnaje pieršačarhovaje lačeńnie, a kamu dastatkova prafiłaktyki i nazirańnia. Tak možna paźbiehnuć niepatrebnych miedycynskich umiašańniaŭ i bolš efiektyŭna vykarystoŭvać resursy.

Pry hetym navukoŭcy nie prapanujuć admovicca ad IMC całkam. Jon zastajecca prostym i karysnym pakazčykam dla pieršasnaj acenki vahi. Ale, jak pakazała daśledavańnie, sam pa sabie IMC nie dazvalaje vyznačyć, ci vyklikaje lišak tłušču chvarobu i nakolki surjoznaja niebiaśpieka dla zdaroŭja čałavieka.

• 0
• 0
• 0
• 0
• 0
• 0
• 0
• 0