Harnałyžnym kompleksam «Łahojsk» ciapier vałodaje kampanija, źviazanaja ź Dźmitryjem Baskavym
Harnałyžny kompleks «Łahojsk», jaki ŭ lipieni hetaha hoda pradali z aŭkcyjonu amal za 20 miljonaŭ rubloŭ, vykupiła kampanija «HrandChaŭzInžynirynh» — jana źviazanaja ź Dźmitryjem Baskavym, vyśvietliła vydańnie «Lusterka». Ale ŭ publičnym dahavory pa ździełcy sa spartcentram fihuruje inšaja firma — «Handlovy dom Prastor», — jakaja adradžaje handlovuju sietku ProStore i źviazana z byłoj biźnies-impieryjaj Juryja Čyža.
U sakaviku hetaha hoda stała viadoma pra zakryćcio harnałyžnaha kompleksu «Łahojsk». Miascovyja ŭłady patłumačyli tady, što kompleks byŭ aryštavany sudom i rychtavaŭsia da prodažu praz adździeł prymusovaha vykanańnia. Jurystka minułaha ŭładalnika — kampanii «Trajpł» — udakładniała, što kompleks prypyniaje dziejnaść.
U lipieni kompleks pradali z aŭkcyjonu. Za jaho zmahalisia dva ŭdzielniki, i kančatkovaja cana dasiahnuła 19 miljonaŭ 553,4 tysiačy rubloŭ.
Chto staŭ novym uładalnikam
Jak vyśvietliła «Lusterka» dziakujučy krynicy, znajomaj ź situacyjaj, novym ułaśnikam majomaści kompleksu stała kampanija «HrandChaŭzInžynirynh». Hetaja firma budavała ŭ Minsku žyły kompleks «Kvartał na Hrušaŭcy».
Skandalny spartyŭny funkcyjanier i sienatar Dźmitryj Baskaŭ vałodaje ŭ joj dolaj u 13%, a jaho asnoŭnyja partniory — Hienadź Naradoŭski i Dzianis Staškievič — majuć pa 25,5% kožny. Jašče 32% — u niamieckaj Mamrud & Smuskovics Beteiligungsgesellschaft.
Dźmitryj Baskaŭ — funkcyjanier z chakiejnaj abojmy Łukašenki, były asabisty trenier Mikałaja Łukašenki. Paśla pracy z kamandaj Alaksandra Łukašenki jon chutka prasunuŭsia pa karjernaj leśvicy ŭ biełaruskim chakiei. Spačatku zajmaŭ pasadu hiendyrektara minskaha «Dynama», zatym uznačaliŭ Fiederacyju chakieja Biełarusi i staŭ členam vykankama Nacyjanalnaha alimpijskaha kamiteta. U 2021 hodzie Mižnarodnaja fiederacyja chakieja adchiliła Baskava na piać hadoŭ, adznačyŭšy na jaho ciesnyja suviazi ź siamjoj Łukašenki i datyčnaść da incydentu, u vyniku jakoha zahinuŭ Raman Bandarenka. Niadaŭna termin jahonaj dyskvalifikacyi praminuŭ, i paśla taho Baskaŭ adrazu ŭznačaliŭ naziralnuju radu chakiejnaha «Dynama» ź Minska.
U apošnija hady Baskaŭ aktyŭna pašyraje svoj biznes, zachoplivajučy ŭsio novyja kirunki, u tym liku šlacham prydušeńnia kankurencyi za košt svajho stanovišča.
«HrandChaŭzInžynirynh» ciapier šukaje rabotnikaŭ dla pracaŭładkavańnia na terytoryi harnałyžnaha kompleksu. Tam patrebnyja elektramancior, ślesar-santechnik, prybiralščyk i pakajoŭki. U abjavach paznačana, što hetyja vakansii buduć aktyŭnyja z 1 śniežnia.
Miesca adpačynku taksama moža być źviazana z novym uładalnikam ProStore.
Niahledziačy na toje, što vałodaje majomaściu kompleksu kampanija Baskava, jana nidzie nie fihuruje na sajcie spartkompleksu. U jakaści vykanaŭcy pasłuh pavodle publičnaha dahavora paznačany «Handlovy dom Prastor». Ad jaho imia dziejničaje namieśnica dyrektara pa kiravańni HSAK «Łahojsk» Julija Ramanoŭskaja. Raniej takim vykanaŭcam značyŭsia «Trajpł» — minuły zasnavalnik spartkompleksu.
Jak zaŭvažyła «Lusterka» ŭ handlovym rejestry, na hetuju ž firmu jašče ŭ krasaviku 2025 hoda byli pierapisanyja restaran «Haścinny majontak» i letniaje kafe, raźmieščanyja ŭ hetym ža spartyŭnym kompleksie. A razam ź imi rytejler zarehistravaŭ narychtoŭčy cech, raźmieščany ŭ kramie ProStore ŭ Łahojsku.
Z ulikam hetaj infarmacyi možna mierkavać, što «Handlovy dom Prastor» taksama maje dačynieńnie da adnaŭleńnia hetaha miesca dla adpačynku i sportu. U toj ža čas u sacsietkach kompleksu «Łahojsk» paznačana, što jaho praca ŭsio jašče prypyniena.
«Haścinny majontak» u minułym hodzie pryznali bankrutam. U sud tady źviarnułasia kampanija «Handlovy dom SŁS», jakoj jon zavinavaciŭsia 38,7 tysiačy rubloŭ. Prytym hetaja firma spačatku inicyjavała bankructva restarana, a potym i sama padała ŭ sud zajavu ab pryznańni svajoj finansavaj niepłaciežazdolnaści. Ciapier jany aboje bankruty.
Akramia taho, pavodle danych na 11 listapada hetaha hoda, mienavita «Handlovamu domu SŁS» pierajšoŭ tavarny znak restarana. Pry hetym abiedźvie firmy, u svaju čarhu, naležali «Trajpłu».
Što viadoma pra hetu kampaniju
«Handlovy dom Prastor» byŭ zarehistravany 28 sakavika 2025 hoda. Pieršapačatkova jon byŭ pad kantrolem rasijskaj «Bierč Inviestmients», stvoranaj Juryjem Čyžom. Ale ŭžo ŭ listapadzie asnoŭnaja dola pierajšła «PrastorKapitału», jaki, u svaju čarhu, naležyć dyrektarcy ProStore Natalli Nieściarovič. A ŭ rasijskaj firmy viadomaha biznesmiena zastałasia dola ŭ 4,7%.
Ciapier u kampanii pracujuć čatyry bujnyja handlovyja abjekty ProStore — dva ŭ Minsku i pa adnym u Łahojsku i Babrujsku. Čakajecca, što ŭ stalicy adkryjecca jašče adna krama hetaj sietki.
Čamu zakryŭsia harnałyžny kompleks «Łahojsk»
Pa televizary pakazali, jak Baskaŭ padaryŭ zaplečniki šmatdzietnaj siamji. A pra ich dom za $1,8 miljona pramaŭčali
Dźmitryj Baskaŭ pašyraje biznes pad brendam Lepshy
Dźmitryj Baskaŭ staŭ suŭładalnikam pivavarnaj kampanii
Dźmitryj Baskaŭ zachodzić na rynak rytejłu
«Synočak, ty ŭ mianie adzin». Maci z Dubroŭna prosić 18‑hadovaha syna viarnucca z rasijskaj armii i źviartajecca da Łukašenki13
«Synočak, ty ŭ mianie adzin». Maci z Dubroŭna prosić 18‑hadovaha syna viarnucca z rasijskaj armii i źviartajecca da Łukašenki
Advakat Alaksandr Danilevič: Mianie adviali ŭ kletku na KPP i začytali ŭkaz dla słužbovaha karystańnia pra pamiłavańnie pa prośbie Mižnarodnaha alimpijskaha kamiteta1010
Kamientary