Iłaryjonaŭ: Pucin pojdzie na sastupki tady, kali spynicca prasoŭvańnie rasijskaj armii

10—11 listapada ŭ Abu-Dabi prajšli pieramovy pradstaŭnikoŭ Ukrainy, Rasii i ZŠA. Pavodle kiraŭnika rasijskaj delehacyi Uładzimira Miadzinskaha, centralnaj temaj stała sistema paślavajennaj biaśpieki. Baki taksama damovilisia pra abmien pałonnymi.

Hetyja pieramovy stali nahodaj dla razmovy ukrainskaj žurnalistki Ludmiły Niamiry z rasijskim ekanamistam, byłym daradcam Pucina Andrejem Iłaryjonavym pra toje, što moža prymusić Pucina pajści na sastupki.

Pazbavić vajnu sensu ŭ pucinskaj łohicy

Iłaryjonaŭ nie pahadziŭsia z prapanavanym žurnalistkaj tłumačeńniem, što pieradumovaj dla pieramoŭ stanovicca «bałans» na froncie, kali nivodzin bok nie zdolny damahčysia značnaha pośpiechu. U jaho razvažańniach vyrašalnaje značeńnie maje toje, ci zdolnaja Ukraina pazbavić Rasiju novych terytaryjalnych zdabytkaŭ.

Na dumku Iłaryjonava, mahčymaść realnych sastupak z boku Kramla zaležyć ad taho, ci zdoleje ŭkrainskaja armija spynić rasijskaje prasoŭvańnie. Jon tłumačyć, jak heta moža paŭpłyvać na raźliki Pucina:

«Mienavita niedapuščeńnie z ukrainskaha boku luboj mahčymaści dla jaho atrymać choć niejkuju terytoryju razburaje samu kancepcyju vajny — i ŭ jaho samoha, i ŭ jaho sprobach pradać hetuju vajnu rasijskamu hramadstvu, rasijskaj armii, nu i jaho mahčymym sajuźnikam za miežami Rasii».

Pry hetym Iłaryjonaŭ adroźnivaje ŭmovy dla pačatku sastupak ad kančatkovaha spynieńnia ahresii. Apošniaje jon źviazvaje z vajennym razhromam ahresara. Ale paŭpłyvać na pazicyju Kramla, pavodle jaho, možna i raniej.

«Kali Uzbrojenyja siły Ukrainy spyniać prasoŭvańnie rasijskich vojskaŭ na terytoryi Ukrainy — jašče nie pieramohuć, jašče nie naniasuć razhromu, jašče nie vykinuć ich z terytoryi Ukrainy, ale spyniać prasoŭvańnie», — tak jon farmuluje hety pramiežkavy krok.

Pavialičyć

Ad źniasileńnia da «ni kroku nazad»

Iłaryjonaŭ supraćpastaŭlaje dva stratehičnyja padychody. Pieršy — źniasileńnie praciŭnika. U razumieńni Iłaryjonava, na taki raźlik abapiraŭsia ŭkrainski bok u pieršyja hady poŭnamaštabnaj vajny: nanosić rasijskamu vojsku straty chutčej, čym jano paśpiavaje ich papaŭniać.

«Samy hałoŭny resurs, samy deficytny resurs, jaki jość u ahresara, — heta žyvaja siła. I takim čynam, źniščajučy žyvuju siłu tempam, jaki pieravyšaje tempy jaje papaŭnieńnia, možna pryvieści ahresara da situacyi, kali ŭ jaho prosta fizična nie budzie chapać uzbrojenych sił dla praciahu ahresii», — apisvaje jon hetuju łohiku.

Inšy padychod, na jakim jon nastojvaje, — utrymańnie terytoryi. Słaviansk, Kramatorsk, Družkoŭka i Kanstancinaŭka, pavodle Iłaryjonava, pavinny stać niepieraadolnym rubiažom dla rasijskaj armii. Ich mahčymuju rolu jon paraŭnoŭvaje sa Stalinhradam i Vierdenam, nazyvajučy takuju stratehiju «ni kroku nazad».

Iłaryjonaŭ dapuskaje, što heta zdolnaje paŭpłyvać i na prychilnikaŭ vajny ŭ Rasii. Jon nie čakaje ad ich raptoŭnaj padtrymki Ukrainy. Mahčymaja źmiena nastrojaŭ, jakuju jon apisvaje, bolš prahmatyčnaja: kali dalejšy zachop nie ŭdajecca, varta abmiežavacca ŭžo zachoplenym.

«U Pucina ŭ hałavie inšaja karta»

Adnačasova Iłaryjonaŭ sumniavajecca, što sama damoŭlenaść ab linii spynieńnia ahniu zdolnaja nadoŭha strymać Pucina. Pryčynu jon bačyć u kancepcyi «histaryčnaj Rasii», jakoj rasijski kiraŭnik abhruntoŭvaje terytaryjalnyja pretenzii.

«U Pucina ŭ hałavie znachodzicca nie hieahrafičnaja karta, ź jakoj my ŭsie pryvykli mieć spravu: hieahrafičnaja karta Rasii, Ukrainy, Jeŭropy ci inšych krain. […] U jaho ŭ hałavie inšaja karta. Ci, prynamsi, jon choča naviazać inšym — hramadstvu, śvietu — svaju ŭłasnuju kartu, svajo ŭjaŭleńnie pra histaryčnuju Rasiju», — miarkuje Iłaryjonaŭ.

Z hetaha jon vyvodzić ryzyku novych patrabavańniaŭ užo paśla dasiahnieńnia pahadnieńnia. U jaho interpretacyi, Pucin moža znoŭ abviaścić «histaryčnaj terytoryjaj» Rasii čarhovuju častku Ukrainy, niezaležna ad raniejšych damoŭlenaściaŭ.

Jak pieramirje moža asłabić Ukrainu

Asnoŭnuju niebiaśpieku paŭzy ŭ bajavych dziejańniach Iłaryjonaŭ bačyć u pastupovym asłableńni ŭkrainskaj abarony. Jon dapuskaje, što partniory pačnuć skaračać padtrymku, bo ŭžo nie buduć bačyć patrebu ŭ raniejšaj pilnaści. Ukrainie tym časam daviadziecca vyrašać pytańnie demabilizacyi.

«Jana vymušanaja rana ci pozna pravodzić demabilizacyju. Jana vymušanaja advodzić častku ŭkrainskich vojskaŭ ad linii frontu. Častka sychodzić zajmacca mirnaj spravaj, častka vyjazdžaje ŭ Jeŭropu da siemjaŭ», — kaža jon.

U apisanym im scenary Rasija čakaje zručnaha momantu dla paŭtornaha napadu: terytaryjalnyja pretenzii zastajucca, a zdolnaść Ukrainy abaraniacca mienšaje.

«Kali hetyja ŭmacavanyja pazicyi nie zajmajucca ŭkrainskimi vojskami, Pucin robić novy ryvok i atrymlivaje i toje, i druhoje, i treciaje», — papiaredžvaje Iłaryjonaŭ.

Heta mahčymy scenar u jaho razvažańniach, a nie ŭstalavany płan rasijskaha kiraŭnictva. Praź jaho Iłaryjonaŭ tłumačyć, čamu spynieńnie ahniu samo pa sabie nie ličyć dastatkovaj harantyjaj biaśpieki.

Jakich abiacańniaŭ Pucin choča ad Jeŭropy

U hetym kantekście Iłaryjonaŭ razhladaje patrabavańni Maskvy ab novaj sistemie jeŭrapiejskaj biaśpieki. Adnoj z metaŭ Kramla jon ličyć imknieńnie zahadzia vyklučyć prysutnaść jeŭrapiejskich vojskaŭ va Ukrainie.

«Pucin choča zaručycca abiacańniami, klatviennymi abiacańniami jeŭrapiejskich krain, što jany nikoli i ni pry jakich umovach nie buduć raźmiaščać svaje vojski na ŭkrainskaj terytoryi», — miarkuje jon.

Aściarožnaść jeŭrapiejskich uradaŭ Iłaryjonaŭ tłumačyć narmalnym i zrazumiełym žadańniem kožnym čynam paźbiehnuć raspaŭzańnia vajny — heta instynktyŭnaje žadańnie lubych mirnych dziaržaŭ. Ale ciapierašniuju pazicyju jeŭrapiejcaŭ Iłaryjonaŭ nie ličyć niaźmiennaj: toje, što raniej adkidałasia jak niedapuščalnaje, z časam stanovicca pradmietam abmierkavańnia.

«Prachodzić čas, mianiajucca abstaviny, mianiajucca ŭmovy. […] Možna ŭjavić sabie situacyju, pry raźvićci jakoj premjer-ministr Vialikabrytanii, prezident Francyi skažuć: «U hetych umovach my abaviazanyja, nie prosta možam, my abaviazanyja raźmiaścić našy vojski na terytoryi Ukrainy», — dapuskaje Iłaryjonaŭ.

• 1
• 0
• 0
• 0
• 0
• 0
• 0
• 0