Sud ES pryznaŭ niepravamiernym biaskoncaje zaciahvańnie Polščaj razhladu zajaŭ na DNŽ

Sud pryznaŭ, što ŭ nadzvyčajnych i niepradbačanych abstavinach krainy ES mohuć nie ŭkładacca va ŭstanoŭlenyja terminy, adnak paśla 31 śniežnia 2022 hoda masavy pryjezd uciekačoŭ z Ukrainy ŭžo nielha ličyć niepradbačanaj situacyjaj. 

Miechanizm prypynieńnia terminaŭ źjaviŭsia ŭ 2022 hodzie, kali ŭ śpiecyjalny zakon ab dapamozie hramadzianam Ukrainy ŭklučyli artykuł 100d. Zhodna ź im, prypynialisia terminy razhladu vajavodami spraŭ ab vydačy dazvołaŭ na pražyvańnie. Heta nie aznačaje, što zajavy pierastali razhladać abo rašeńni pa ich nie prymalisia. Adnak na hetyja spravy bolš nie raspaŭsiudžvalisia zvyčajnyja časavyja abmiežavańni, a dziaržaŭnyja orhany nie atrymlivali štrafaŭ za niesvoječasovaje pryniaćcie rašeńniaŭ. Taki paradak dziejničaje z sakavika 2022 hoda i nieadnarazova praciahvaŭsia. Apošni raz jaho padoŭžyli da sakavika 2027 hoda.

Padstavaj dla razhladu pytańnia ŭ Sudzie ES stała sprava zamiežnika, jaki ŭ krasaviku 2024 hoda padaŭ zajavu na atrymańnie dazvołu na časovaje žycharstva z metaj navučańnia. Nie dačakaŭšysia rašeńnia, u listapadzie taho ž hoda jon źviarnuŭsia ŭ administracyjny sud sa skarhaj na biaździejnaść vajavody. Toj spasłaŭsia na artykuł 100d. Administracyjny sud u Hlivicach zasumniavaŭsia, ci adpaviadaje takaja norma zakanadaŭstvu Jeŭrasajuza, i pieradaŭ pytańnie na razhlad Suda ES.

Sud nahadaŭ, što ŭ zvyčajnych umovach zajavy na atrymańnie dazvołu na pražyvańnie z metaj navučańnia pavinny razhladacca na praciahu 90 dzion. Kali niepieraadolnyja abstaviny pieraškadžajuć dziaržaŭnym orhanam pravieści nieabchodnyja pravierki i pryniać rašeńnie ŭ hety termin, dziaržavu nielha vinavacić u parušeńni časavych abmiežavańniaŭ. Adnak spasyłacca na takija abstaviny možna tolki na praciahu času, nieabchodnaha dla pieraadoleńnia adpaviednych pieraškodaŭ.

U apublikavanym reziume rašeńnia adznačajecca, što paśla 31 śniežnia 2022 hoda masavy pryjezd ludziej, vymušanych pakinuć svaje damy praz rasijskuju ahresiju suprać Ukrainy, užo nielha było ličyć niepradbačanaj padziejaj. Taksama sud nie ŭbačyŭ paćviardžeńnia taho, što praciah prypynieńnia dziejańnia normaŭ ab adkaznaści za biaździejnaść administracyjnych orhanaŭ da 30 vieraśnia 2025 hoda śviedčyŭ pra naležnuju starannaść polskich uładaŭ u vyrašeńni prablemy. Hety termin byŭ paznačany ŭ materyjałach spravy, bo na toj momant dziejničała mienavita takoje padaŭžeńnie.

Pry hetym rašeńnie Suda ES datyčycca kankretnaj spravy i samo pa sabie nie admianiaje polskuju normu ab prypynieńni terminaŭ. Raniej polskija sudy taksama prymali rašeńni na karyść zamiežnikaŭ, adznačajučy, što norma, jakaja pazbaŭlaje čałavieka mahčymaści abskardzić biaździejnaść dziaržaŭnaha orhana, supiarečyć Kanstytucyi Polščy. Adnak takija rašeńni pa asobnych spravach dahetul nie pryviali da źmieny ahulnaha paradku.

• 5
• 0
• 0
• 1
• 0
• 0
• 0
• 0