Ranicaj 69‑hadovaj žycharcy adnaho z damoŭ na vulicy Hromava ŭ vajbiery patelefanavaŭ nieviadomy mužčyna i pradstaviŭsia supracoŭnikam UP «Minhaz».
Jon paviedamiŭ, što płanujecca pravierka hazavaha abstalavańnia, i ŭdakładniŭ, kali žančyna zmoža zabiaśpiečyć dostup u kvateru. Minčanka ździviłasia, bo ŭ jaje šmatpaviarchoviku ŭstanoŭleny elektraplity, adnak surazmoŭca zajaviŭ, što śpiecyjalisty ŭsio roŭna pavinny pryjechać i skłaści akt, paviedamlajuć Minsk-naviny.
Paśla na mabilny telefon piensijanierki pačali prychodzić roznyja kody. Jana nazvała ich, paśla čaho razmova była zavieršanaja.
Praź niekatory čas u miesiendžary joj patelefanavaŭ «načalnik adździeła finansavych rasśledavańniaŭ» i zajaviŭ, što žančyna trapiłasia na chitryki telefonnych machlaroŭ. Pavodle jaho słoŭ, paśla raskryćcia kanfidencyjnych kodaŭ na jaje imia złamyśniki aformili kredyt na sumu 30 tysiač rubloŭ.
Zatym z žančynaj źviazaŭsia «supracoŭnik Nacbanka». Jon paviedamiŭ, što pa miescy jaje žycharstva płanujecca pieratrus i ŭsie znojdzienyja hrošy mohuć kanfiskavać biez mahčymaści viartańnia. Kab hetaha nie adbyłosia, ich nieabchodna zadekłaravać, pieravioŭšy na «biaśpiečny» rachunak. Taksama nieznajomiec zapeŭniŭ, što paśla zakančeńnia razboru joj viernuć usie hrošy da kapiejki.
Ustryvožanaja žančyna paviedamiła, što maje 29 562 dalary, 2 790 jeŭra i 1 600 rubloŭ.
Spačatku surazmoŭca prapanavaŭ pryvieźci hatoŭku na nazvany im adras. Adnak, pakolki padžyłaja minčanka mieła prablemy sa zdaroŭjem, jon pahadziŭsia dasłać pa hrošy «kalehu», jaki pavinien byŭ nazvać kodavuju frazu — «Ruža».
Praź niekalki hadzin u dźviery minčanki patelefanavaŭ 20‑hadovy maładzion. Žančyna pieradała jamu polietylenavy pakiet z usim svaim aščadkam.
Kali kurjer syšoŭ, piensijanierka patelefanavała ŭ bank i daviedałasia, što nijakich kredytaŭ i pazyk na jaje imia nie afarmlali. U hety momant jana zrazumieła, što stała achviaraj telefonnych machlaroŭ.
Varta adznačyć, što minčanka nieadnarazova čuła pra taki vid machlarstva, adnak złamyśniki nastolki jaje zapałochali, što jana im pavieryła.
Milicyi ŭ toj ža dzień udałosia ŭstanavić asobu kurjera. Im byŭ małady čałaviek, jaki taksama pavieryŭ złamyśnikam.
Jany paviedamili jamu, što ŭ jaho zakančvajecca termin dziejańnia damovy na vykanańnie pasłuh mabilnaj suviazi. Kab nie jechać u ofis kampanii, jamu prapanavali padoŭžyć damovu dystancyjna — dla hetaha patrabavałasia paviedamić pašpartnyja danyja i kod z SMS.
Dalej usio adbyvałasia pavodle padobnaha scenaru: nibyta na imia junaka aformili kredyt, a hrošy vykarystali ŭ złačynnych metach. Ź jaho navat uziali raśpisku ab nievydavańni danych papiaredniaha śledstva, zapałochaŭšy kryminalnaj adkaznaściu.
Pakolki padčas razmovy z machlarami małady čałaviek znachodziŭsia ŭ Hrodzienskaj vobłaści, jamu prapanavali terminova pryjechać u Minsk, kab dapamahčy padžyłaj žančynie zadekłaravać hrošy. Jon tak i zrabiŭ.
Pakiet z hrašyma pa ŭkazańni złačyncaŭ junak advioz za horad i schavaŭ za transfarmatarnaj budkaj, paśla čaho sfatahrafavaŭ jaho i adpraviŭ złamyśnikam zdymak.
Ciapier čytajuć
Prajektavali karoŭniki i akumulatarny zavod, a ciapier uzialisia za baroka. Ź vieličnaha jezuickaha kalehiuma ŭ Pinsku źbirajucca źbić uvieś tynk — a jon byŭ raśpisany freskami
Kamientary