Prosta źniać łaźniu ŭ ahrasiadzibie bolš nie vyjdzie. Dla ŭładalnikaŭ i haściej zapracavali novyja praviły
Pryjechać u chatku na vioscy, kab prosta pasmažyć šašłyki, schadzić u łaźniu i pieranačavać, bolš nie atrymajecca. Pa abnoŭlenych praviłach uładalnikam ahrasiadzib aficyjna zabaranili zdavać pakoi ŭ zvyčajnuju arendu, a zaadno abaviazali ŭciahvać kožnaha hościa ŭ miascovyja tradycyi, kuchniu ci krajaznaŭstva, piša Domovita.by.

Padrabiaznaści Ukaza № 275 i listapadaŭskaj pastanovy Saŭmina rastłumačyli śpiecyjalisty Nacyjanalnaha ahienctva pa turyźmie na vebinary Nacyjanalnaha centra zakanadaŭstva i pravavoj infarmacyi. Pieramieny zakranuli nie tolki farmat adpačynku, ale i padatki, ilhotnyja kredyty i navat adnosiny z susiedziami, čyja zhoda ciapier vyrašaje los luboha śviata ŭ dvary.
Nijakaj zvyčajnaj arendy i słova susieda
Pa novych praviłach ahrasiadziba bolš nie moža pracavać jak zvyčajny katedž na sutki. Zdavać pakoi prosta ŭ arendu abo najom haspadaram zabaranili. Lubaja damova z hościem abaviazanaja ŭklučać jak minimum dźvie pasłuhi, pryčym adna ź ich pavinna znajomić ź miascovym pobytam, pryrodaj ci kuchniaj.
Kali turyst zachoča źniać tolki łaźniu, aformić taki zakaz pa zakonie nie vyjdzie. Da jaje daviadziecca dadać krajaznaŭčuju ekskursiju, dehustacyju fiermierskaj ježy, majstar-kłas abo narodnaje śviata. Zatoje dla ekskursij haspadaram i ich rabotnikam nie patrebnaja atestacyja hida. A dla tradycyjnych śviat biez prodažu kvitkoŭ i ź biełaruskimi artystami bolš nie daviadziecca afarmlać uklučeńnie ŭ rejestr arhanizataraŭ mierapryjemstvaŭ Minkulta.
A voś z hulańniami na vulicy ŭsio stała stražej. Pravieści siamiejnuju ŭračystaść, hastraviečar abo falkłornuju sustreču ŭ dvary atrymajecca tolki sa zhody susiedziaŭ, uklučajučy tych, chto žyvie praz darohu. Padydzie navat SMS abo paviedamleńnie ŭ miesiendžary z dataj i časam padziei, ale dziejničaje heta praviła kruhłasutačna, a nie tolki paśla 23:00. Bolš za toje, susied maje prava pieradumać i adklikać svaju zhodu za dzień da śviata — tady mierapryjemstva na pavietry daviadziecca admianiać.
Da 15‑ci pakojaŭ, kredyty pad 5% i ahulny katałoh
Pry hetym uładalnikam siadzib dazvolili pašyracca. Limit žyłych pakojaŭ u domie padniali z 10 da 15. Praŭda,zabudoŭvać učastak inšymi kapitalnymi budynkami dla načlehu haściej, akramia samoj siadziby i haściavych damkoŭ, pa-raniejšamu nielha.
Dapamahčy z budoŭlaj pavinien ilhotny kredyt ad Biełahraprambanka pad 5% hadavych. Termin jaho viartańnia pavialičyli z 7 da 10 hadoŭ dla fizičnych asob i z 5 da 8 hadoŭ dla sielhasarhanizacyj, a staruju stol u 2000 bazavych vieličyń naohuł prybrali. Hrošy dazvalajuć puścić na ramont, haściavyja domiki, kuplu invientaru abo ŭparadkavańnie ŭčastka. Navat kali haspadar užo braŭ taki kredyt šmat hadoŭ tamu, padacca paŭtorna nie zabaraniajuć — bank budzie ŭličvać novy prajekt i realnyja dachody.

Zaadno ŭ krainie źjavicca adziny adkryty rejestr usich ahrasiadzib z adrasami, kantaktami i cenami. Spačatku jaho zapuściać na sajcie Nacyjanalnaha ahienctva pa turyźmie, a potym pieraniasuć na płatformu «Razumny horad (rehijon)» z pošukam pa pasłuhach.
Traktar nie ŭratuje ad padatku ŭ 10%
Pa zmaŭčańni ŭładalniki ahrasiadzib płaciać 10% padatku na prafiesijny dachod. Pierajści na fiksavany zbor u 45 rubloŭ u miesiac mohuć tolki tyja, chto pracuje za miežami Minskaha rajona i znachodzicca jak minimum za 10 kiłamietraŭ pa darozie ad miažy rajcentra. Kali padjezdaŭ da siadziby niekalki, adlehłaść paličać pa samym karotkim maršrucie.
Ale adnoj addalenaści mała — daviadziecca dakazać, što turystaŭ realna pahružajuć u miascovyja tradycyi i pobyt. Prosta pryparkavać u dvary traktar MTZ nie spracuje: rajonnaja kamisija pravieryć, ci pravodziać dla haściej sapraŭdnyja ekskursii, majstar-kłasy abo zbor uradžaju. Hladzieć buduć na damovy, majsterni, zapasy hliny ci muki i navat na vodhuki ŭ internecie. Pry hetym patrabavać lišnija papiery nakštałt technałahičnych kart vykankamam nie dazvolili.
Usie staryja biesterminovyja dazvoły na zbor u 45 rubloŭ pierastanuć dziejničać 31 śniežnia 2026 hoda, tak što ŭładalnikam daviadziecca padavać zajavy nanova. A tym, chto tolki źbirajecca zajści ŭ hety biznes, varta zakryć staryja daŭhi: šlach u ahraturyzm zakryli daŭžnikam pa zarobkach, hramadzianska-pravavych damovach i kampiensacyjach škody zdaroŭju.
Ciapier čytajuć
Prajektavali karoŭniki i akumulatarny zavod, a ciapier uzialisia za baroka. Ź vieličnaha jezuickaha kalehiuma ŭ Pinsku źbirajucca źbić uvieś tynk — a jon byŭ raśpisany freskami
Kamientary