Seks z efiektam prysutnaści. U amierykanskich 4DX kinateatrach źjaviŭsia novy trend
U ZŠA znajšli niečakanaje prymianieńnie technałohii 4DX, jakaja raniej vykarystoŭvałasia pieravažna ŭ bajavikach. Ciapier, jak piša CNN, ź jaje dapamohaj ramantyčnyja filmy pieratvarajuć u svojeasablivyja atrakcyjony.

Technałohija 4DX źjaviłasia ŭ amierykanskich kinateatrach jašče ŭ 2014 hodzie. Jana dazvalaje hledačam nie tolki bačyć i čuć toje, što adbyvajecca na ekranie, ale i fizična adčuvać padziei filma. Kresły mohuć chistacca, nachilacca i vibravać, a ŭ zale stvarajucca paryvy vietru, raspylajucca vada i roznyja pachi.
Raniej takija efiekty vykarystoŭvali pieravažna ŭ darahich bajavikach, filmach pra supierhierojaŭ i vajennych stužkach. Ale niadaŭna kinaprakatčyki vyjavili, što technałohija moža pryciahnuć zusim inšuju aŭdytoryju — amataraŭ ramantyčnych historyj sa scenami seksu.
Usio pačałosia z fentezijnaj ramantyčnaj kamiedyi «Plecieny muž» (Wicker) z Alivijaj Kołman i Alaksandram Skarshardam u hałoŭnych rolach. Pavodle siužeta, rybačka, jakuju pahardliva ŭsprymajuć adnaviaskoŭcy, zamaŭlaje miascovamu majstru muža, splecienaha z łazy. Niezvyčajny muž nie tolki stanovicca jaje kachankam, ale i vyklikaje zajzdraść u inšych žycharoŭ vioski.

Paśla vychadu trejlera, u jakim jość scena seksu, što zakančvajecca złamanym łožkam, u sacyjalnych sietkach pačali žartavać, što film abaviazkova treba pakazać u farmacie 4DX. Karystalniki ŭjaŭlali, jak kresły ŭ kinateatry buduć paŭtarać ruchi hierojaŭ.
Žartaŭ akazałasia tak šmat, što dystrybjutar Black Bear Pictures i paŭdniovakarejskaja kampanija CJ 4DPLEX, jakaja raspracoŭvaje technałohiju, vyrašyli ŭvasobić ideju ŭ žyćcio. Śpiecyjalisty ŭ Sieule padabrali ruchi kresłaŭ i inšyja efiekty da roznych epizodaŭ filma, u tym liku intymnych.
Pieršapačatkova pakaz 28 kastryčnika płanavaŭsia jak adnarazovaja rekłamnaja akcyja. Ale popyt akazaŭsia nastolki vialikim, što bilety na sieansy raskupili jašče da ich aficyjnaha anansavańnia. Videa z reakcyjami hledačoŭ stali virusnymi ŭ sacyjalnych sietkach, faktyčna zabiaśpiečyŭšy filmu biaspłatnuju rekłamu. U vyniku pakazy praciahnulisia na niekalki tydniaŭ.
Film ź biudžetam usiaho $10 miljonaŭ sabraŭ u amierykanskim prakacie kala $23 miljonaŭ, ź jakich prykładna $1,4 miljona prypała na 4DX-sieansy.
Pośpiech ekśpierymientu padšturchnuŭ sietku kinateatraŭ Regal paŭtaryć jaho z papularnym kanadskim sieryjałam «Śpiakotnaje supiernictva» (Heated Rivalry) pra ramantyčnyja adnosiny dvuch chakieistaŭ — kanadca Šejna Chołandera i rasijanina Ilji Razanava.

16 listapada ŭ 59 kinateatrach sietki adbylisia 96 śpiecyjalnych pakazaŭ dvuch apošnich sieryj pieršaha siezona. Prykładna na kožnym dziasiatym sieansie ŭsie bilety byli raspradadzienyja.
Na adnym z takich pakazaŭ u kinateatry na Tajms-skvier u Ńju-Jorku pabyvaŭ karespandent CNN. Pa jaho słovach, padčas scen seksu kresły ruchalisia ŭ takt rucham hierojaŭ, a ŭ adnym z epizodaŭ aralnaha seksu jašče i raspyrskvałasia vada. Kali ž dziejańnie pieranosiłasia ŭ maroznuju Maskvu, hledačy adčuvali chałodny viecier.
Dla mnohich naviedvalnikaŭ heta byŭ pieršy dośvied prahladu ŭ farmacie 4DX. Siarod ich pieravažali žančyny i kvir-mužčyny — aŭdytoryja, na jakuju raniejšyja 4DX-pakazy, pieravažna bajavikoŭ i filmaŭ pra supierhierojaŭ, zvyčajna nie byli raźličanyja.
Pry hetym, jak raskazvajuć sami hledačy, ich pryciahvaje nie stolki mahčymaść fizična adčuć toje, što adbyvajecca padčas intymnych scen, kolki niezvyčajny sposab viesieła pravieści čas razam ź siabrami i inšymi prychilnikami lubimych historyj.
Tak žart u internecie pieratvaryŭsia ŭ novy kinatrend. I, miarkujučy pa pośpiechu pieršych pakazaŭ, nazirać za seksam na vialikim ekranie ŭ kampanii nieznajomcaŭ, kali kresły pad taboj ruchajucca ŭ takt padziejam, akazałasia dla mnohich niečakana pryvabnaj zabavaj.
Ciapier čytajuć
Prajektavali karoŭniki i akumulatarny zavod, a ciapier uzialisia za baroka. Ź vieličnaha jezuickaha kalehiuma ŭ Pinsku źbirajucca źbić uvieś tynk — a jon byŭ raśpisany freskami
Kamientary