U Izraili zabrakavali vendžanuju stronhu ź Biełarusi. U joj znajšli niebiaśpiečnuju bakteryju
U Izraili adklikali z prodažu zamarožanaje file vendžanaj stronhi biełaruskaj vytvorčaści kampanii «Santa Bremar». U pradukcyi znajšli niebiaśpiečnuju bakteryju Listeria monocytogenes, jakaja vyklikaje listeryjoz. Pra heta paviedamiła Ministerstva achovy zdaroŭja Izraila.

Bakteryju znajšli ŭ partyi praduktu «File stronhi salonaje, vendžanaje, narezanaje, zamarožanaje» pad nazvaj Trout Smoked. Pradukcyja była rasfasavanaja va ŭpakoŭki pa 100 hramaŭ i vyrablenaja 24 červienia 2026 hoda.
Imparcior razam ź izrailskim Ministerstvam achovy zdaroŭja arhanizavaŭ jaje vydaleńnie z handlovych sietak. Kupcoŭ, jakija ŭžo nabyli hety tavar, zaklikali nie ŭžyvać jaho ŭ ježu.
Listeryjoz — infiekcyjnaje zachvorvańnie, jakoje pieradajecca praz zaražanyja pradukty, hatovyja da ŭžyvańnia biez termičnaj apracoŭki. Siarod ich mohuć być miakkija syry, paštety, vendžanaja i salonaja ryba. Asablivuju niebiaśpieku bakteryja ŭjaŭlaje tamu, što zdolnaja vyžyvać i razmnažacca navat pry nizkich tempieraturach, tamu zamarožvańnie nie harantuje biaśpieki praduktu.
U zdarovych ludziej chvaroba moža praciakać adnosna lohka, vyklikajučy pavyšeńnie tempieratury, bol u ciahlicach, młosnaść i dyjareju. Adnak u ciažarnych žančyn, niemaŭlat, pažyłych ludziej i ludziej z asłablenym imunitetam infiekcyja moža pryvieści da surjoznych uskładnieńniaŭ, u tym liku siepsisu i mieninhitu.
Dla ciažarnych zaražeńnie moža skončycca vykidyšam, miortvanaradžeńniem abo ciažkim zachvorvańniem niemaŭlaci. Listeryjoz lečać antybijotykami. Ludziam z hrup ryzyki rekamiendujuć paźbiahać niepasteryzavanych małočnych praduktaŭ i nie ŭžyvać astudžanyja vendžanyja morapradukty.
Ciapier čytajuć
Prajektavali karoŭniki i akumulatarny zavod, a ciapier uzialisia za baroka. Ź vieličnaha jezuickaha kalehiuma ŭ Pinsku źbirajucca źbić uvieś tynk — a jon byŭ raśpisany freskami
Kamientary