Śviet

BepiColombo dalacieŭ da Mierkuryja — paśla vaśmi hadoŭ padarožža ŭ kosmasie jon vyjdzie na arbitu hetaj zahadkavaj płaniety

Pieraadoleŭšy 10 miljardaŭ kiłamietraŭ, kaśmičny aparat BepiColombo zdoleŭ nablizicca da Mierkuryja i rychtujecca vyjści na jaho arbitu. Padarožža da hetaj zahadkavaj płaniety — sumiesny prajekt Jeŭrapiejskaha kaśmičnaha ahienctva (ESA) i Japonskaha ahienctva aerakaśmičnych daśledavańniaŭ (JAXA), piša Bi-bi-si.

Skrynšot videa Bi-bi-si

Aparat akažacca ŭ nadzvyčaj surovych umovach: Mierkuryj — najbližejšaja da Sonca płanieta, i tempieratura na jaho pavierchni moža dasiahać +430°C u dzionny čas, a ŭnačy apuskacca da −180°C. Akramia taho, płanieta pastajanna zaznaje ŭździejańnie intensiŭnaha soniečnaha vypramieńvańnia.

Misija BepiColombo moža dapamahčy razhadać hałoŭnyja tajamnicy Mierkuryja. Navukoŭcy spadziajucca vyśvietlić, čamu ŭ kratarach płaniety zachoŭvajecca lod, niahledziačy na blizkaść da Sonca, a taksama zrazumieć pachodžańnie zahadkavych pahłybleńniaŭ, jakimi ŭsiejana pavierchnia Mierkuryja.

«Mnie zdajecca, siarod płaniet unutranaj častki Soniečnaj sistemy Mierkuryju ŭdzialajuć niezasłužana mała ŭvahi, ale heta taksama adna z tych pryčyn, jakija robiać płanietu cikavaj dla vyvučeńnia», — kaža adna ź viadučych daśledčyc misii prafiesarka Ema Bans ź Lesterskaha ŭniviersiteta.

Aparat BepiColombo zapuścili ŭ 2018 hodzie z kasmadroma ŭ Francuzskaj Hvijanie. Dabracca da Mierkuryja jamu było niaprosta: praz mocnaje hravitacyjnaje pryciahnieńnie Sonca aparatu daviałosia pastajanna karektavać chutkaść i trajektoryju palotu.

Fota NASA

Na praciahu ŭsiaho padarožža BepiColombo davodziłasia pastajanna tarmazić. Dla hetaha aparat niekalki razoŭ pralataŭ mima płaniet, pryciahnieńnie jakich dapamahała jamu zamarudzicca i źmianić kirunak palotu. Takim čynam za vosiem hadoŭ jon adzin raz ablacieŭ Ziamlu, dvojčy — Vienieru i šeść razoŭ — Mierkuryj.

Samy ryzykoŭny manieŭr čakaje aparat pry vychadzie na arbitu Mierkuryja. BepiColombo treba budzie za 11 chvilin źnizić chutkaść nastolki, kab pryciahnieńnie Mierkuryja ŭtrymała jaho na arbicie. Kali štości pojdzie nie tak, jon moža prosta pralacieć mima płaniety.

Dahetul da Mierkuryja nabližalisia tolki dva kaśmičnyja aparaty — abodva ŭ miežach misij NASA. U 1970‑ch hadach Mariner 10 trojčy pralacieŭ mima płaniety. U 2011 hodzie na arbitu Mierkuryja vyjšaŭ kaśmičny aparat «Miesiendžar», jaki prapracavaŭ tam čatyry hady. Dziakujučy jamu navukoŭcy vyjavili lod u kratarach kala polusaŭ płaniety. Akramia taho, vyśvietliłasia, što mahnitnaje pole Mierkuryja ssunutaje adnosna centra płaniety prykładna na 10% jaje radyusa.

Padčas misii navukoŭcy asablivuju ŭvahu ŭdzielać niezvyčajnym zapadzinam na pavierchni płaniety. Takich pahłybleńniaŭ na Mierkuryi tysiačy. Jany niehłybokija, majuć stromkija ścienki, časta raźmiaščajucca hrupami i pa hieałahičnych mierkach vielmi maładyja — ich uzrost składaje kala 100 tysiač hadoŭ. Daśledčyki vyśvietlili, što hetyja zapadziny ŭźnikli nie ŭ vyniku padzieńnia mietearytaŭ, adnak jak mienavita jany ŭtvarylisia, pakul nieviadoma.

BepiColombo taksama dapamoža vyvučyć jašče adnu asablivaść Mierkuryja: niahledziačy na nievialikija pamiery płaniety (jana mienšaja za naš Miesiac), u jaje niezvyčajna vialikaje mietaličnaje jadro.

Pavodle słoŭ prafiesarki Emy Bans, u minułym Mierkuryj moh być značna bujniejšym.

«Pavodle adnoj ź viersij, u vyniku mahutnaha sutyknieńnia płanieta pazbaviłasia svajoj mantyi. Abo pryčynaj stała cełaja sieryja sutyknieńniaŭ, jakija adbyvalisia na praciahu bolš doŭhaha času. Pastupova jany zryvali źniešnija płasty płaniety — mantyju i karu — i ŭ vyniku sfarmiravali toj Mierkuryj, jaki my nazirajem siońnia», — tłumačyć Bans.

Zrešty, pavodle słoŭ navukoŭcy, isnuje vierahodnaść, što Mierkuryj pieršapačatkova sfarmiravaŭsia takim u bahataj na mietały vobłaści Soniečnaj sistemy na rańnim etapie jaje isnavańnia.

U misii jość niezvyčajnaja asablivaść: na borcie znachodziacca adrazu dva kaśmičnyja aparaty. Praź niekalki tydniaŭ paśla prybyćcia da Mierkuryja jany padzielacca.

Jeŭrapiejski aparat ESA budzie daśledavać pavierchniu płaniety ź blizkaj adlehłaści, a japonski aparat JAXA pačnie nazirać za Mierkuryjem z addalenaj arbity.

Fota: ESA/Java

Poŭnapamiernaja madel BepiColombo pradstaŭlena ŭ Muziei navuki ŭ Łondanie. Jaje raspracoŭvała sistemny inžynier kampanii Airbus Džesika Maršał, jakaja pakazała žurnalistam klučavyja elemienty kanstrukcyi aparata.

Pavodle słoŭ Maršał, momant padziełu dvuch aparataŭ prymusić kamandu pachvalavacca.

«My raspracavali śpiecyjalny miechanizm i vielmi staranna pradumali kanstrukcyju BepiColombo. Na praciahu vaśmi hadoŭ jon zaznavaŭ uździejańnie kaśmičnaha vypramieńvańnia i vialikich pierapadaŭ tempieratury. Ciapier spružynny miechanizm pavinien spracavać i vielmi płaŭna vyzvalić aparaty», — raspaviała inžynier.

Z dapamohaj dvuch arbitalnych aparataŭ, abstalavanych mnostvam navukovych pryboraŭ, kamanda BepiColombo spadziajecca raskryć tajamnicy hetaj płaniety. A mahčyma, i vyjavić šmat novych zahadak.

Kamientary

Ciapier čytajuć

«Samy niebiaśpiečny — Piatruchin. A bolšaść — karysnyja idyjoty». Admin kanała «Biełaruskaja ahientura» daŭ vialikaje intervju29

«Samy niebiaśpiečny — Piatruchin. A bolšaść — karysnyja idyjoty». Admin kanała «Biełaruskaja ahientura» daŭ vialikaje intervju

Usie naviny →
Usie naviny

Rabić vahony dla minskaha mietro znoŭ chočuć daručyć «Štadleru»6

«Biełtelekam» znoŭ abjaviŭ pra pavyšeńnie svaich taryfaŭ

Pad Barysavam upalavali pieršuju ŭ hetym siezonie ryś2

Analityka Volhu Charłamavu asudzili na 10 hadoŭ kałonii6

Biełarusy masava biaruć ilhotnyja kredyty pad 4%1

U internecie hałasujuć za turystyčny łahatyp Biełarusi. Siarod lidaraŭ prajekt byłoha palitviaźnia4

Dua Lipa ŭžo nosić kurtku, jakuju ŭsie zachočuć hetaj zimoj11

«Heta takaja drobnaja, ahidnaja pomsta Ramana». Sofja Sapieha raskazała, jak jaje padmanam źniali dla pieradačy Pratasieviča12

Zapłacili, kab źmierznuć na stadyjonie. Fanaty «Sełtyka» sabrali 90 tysiač jeŭra za adnu noč1

bolš čytanych navin
bolš łajkanych navin

«Samy niebiaśpiečny — Piatruchin. A bolšaść — karysnyja idyjoty». Admin kanała «Biełaruskaja ahientura» daŭ vialikaje intervju29

«Samy niebiaśpiečny — Piatruchin. A bolšaść — karysnyja idyjoty». Admin kanała «Biełaruskaja ahientura» daŭ vialikaje intervju

Hałoŭnaje
Usie naviny →

Zaŭvaha:

 

 

 

 

Zakryć Paviedamić