Padčas śmiarotnaha pakarańnia ŭ Techasie, jakoje doŭžyłasia bolš za hadzinu, asudžany kryčaŭ ad bolu
Rejnalda Denies pravioŭ u čakańni pryviadzieńnia prysudu ŭ vykanańnie 40 hadoŭ.

U Techasie padčas vykanańnia śmiarotnaha prysudu asudžany kryčaŭ, śćviardžajučy, što jamu baluča. U vyniku pakarańnie śmierciu praź śmiarotnuju injekcyju praciahvałasia bolš za hadzinu, piša Bi-bi-si.
Pa słovach śviedak, 70‑hadovy Rejnalda Denies kazaŭ: «Heta nie pracuje tak, jak pavinna», kali jamu ŭvodzili preparat pientabarbitał.
Pres-sakratarka Departamienta kryminalnaha pravasudździa Techasa paviedamiła, što ŭ Deniesa doŭha šukali vieny dla ŭviadzieńnia preparata, ale dadała, što asudžany skardziŭsia na bol u tych častkach cieła, dzie sproby injekcyj nie rabilisia.
Vypadak z Deniesam adbyŭsia śledam za niaŭdałym pakarańniem śmierciu asudžanaj z Tenesi Krysty Pajk, jakaja padčas padobnaj pracedury ŭ vieraśni pieražyła ŭviadzieńnie dźviuch śmiarotnych doz pientabarbitału i, jak ličycca, stała adzinym čałaviekam, jaki vyžyŭ paśla sproby śmiarotnaha pakarańnia z dapamohaj injekcyi.
Denies byŭ prysudžany da śmiarotnaha pakarańnia za zabojstva ŭ 1996 hodzie Janaša Šuča, handlara ałmazami, jakoha znajšli sa šmatlikimi ahniastrelnymi ranieńniami.
U dzień, kali jaho pakarali śmierciu, u inšym amierykanskim štacie, Fłarydzie, pakarali śmierciu jašče adnu źniavolenuju.
Śmiarotnyja pakarańni z vykarystańniem śmiarotnaha preparata zvyčajna doŭžacca ad niekalkich chvilin da bolš čym hadziny.
Majkł Hračyk, karespandent ahienctva Associated Press, jaki byŭ śviedkam mnohich padobnych pakarańniaŭ śmierciu, raspavioŭ, što hetym razam u turmie horada Chantśvił u Techasie jamu i inšym śviedkam daviałosia čakać niezvyčajna doŭha, pierš čym ich praviali ŭ kamieru dla injekcyj. Pavodle jaho słoŭ, takija zatrymki zvyčajna źviazanyja z supracivam źniavolenaha pracedury abo ź ciažkaściami pry pošuku vien.
Kali śviedak narešcie puścili ŭnutr, Denies amal adrazu ŭskliknuŭ: «Hety bol! Sychodźcie! Sychodźcie!», — raspavioŭ Hračyk. Zatym jon vyłajaŭsia i paprasiŭ «baćku» «zabrać hety bol».
Paśla hetaha jon zakryčaŭ: «Maja pravaja naha mianie zabivaje!», apisvajučy heta jak sutarhu. Vyłajaŭšysia jašče raz, jon zastahnaŭ i chrypła pramarmytaŭ: «Nie dumaju, što heta narmalna».
Inšy śviedka, śviatar Džef Chud, raspavioŭ haziecie USA Today, što pakarańnie Deniesa było «biezumoŭna samym žudasnym» z usich, što jon bačyŭ. «Jon [Denies] kryčaŭ: «Maja naha, maja naha, maja naha», — skazaŭ Chud. — Jon dvojčy kryčaŭ: «Heta nie pracuje tak, jak pavinna»».
Vykarystańnie pientabarbitału znoŭ stała pradmietam pilnaj uvahi paśla taho, jak asudžanaja za zabojstva 50‑hadovaja Krysta Pajk u vieraśni pieražyła dźvie sproby pakarańnia praź śmiarotnuju injekcyju. Jaje dastavili ŭ balnicu ŭ krytyčnym stanie, a zatym viarnuli ŭ turmu.
Jaje niaŭdałaje pakarańnie pryciahnuła ŭvahu i šakavała ŭvieś śviet.
Pientabarbitał — heta mahutny siedatyŭny srodak, jaki zapavolvaje pracu arhanizma, u tym liku niervovaj sistemy. Daktary časam vykarystoŭvajuć jaho dla lačeńnia peŭnych zachvorvańniaŭ, ale ŭ vysokich dozach jon taksama moža prymianiacca ŭ jakaści śmiarotnaj injekcyi.
Jaho vykarystańnie pry śmiarotnych pakarańniach znoŭ stała pradmietam pilnaj uvahi ŭ minułym hodzie paśla taho, jak padčas pravierki, praviedzienaj uradam ZŠA ŭ hady prezidenctva Džo Bajdena, byli vykazanyja aściarohi adnosna taho, što hety preparat moža vyklikać «niepatrebny bol i pakuty».
Administracyja Bajdena zabaraniła jaho vykarystańnie pry pakarańniach śmierciu na fiederalnym uzroŭni, ale heta nie zjaŭlajecca abaviazkovym na ŭzroŭni štataŭ — kožny štat moža vybirać svaje ŭłasnyja mietady zabojstva źniavolenych.
Ciapier čytajuć
Prajektavali karoŭniki i akumulatarny zavod, a ciapier uzialisia za baroka. Ź vieličnaha jezuickaha kalehiuma ŭ Pinsku źbirajucca źbić uvieś tynk — a jon byŭ raśpisany freskami
Kamientary