Сустрэча з брытанскімі марскімі пяхотнікамі ў сераду стала апошнім публічным мерапрыемствам, у якім 96-гадовы герцаг Эдынбургскі ўзяў удзел у якасці афіцыйнага прадстаўніка брытанскай каралеўскай сям'і, піша ВВС.
З таго часу, як яго жонка, каралева Лізавета II ўзышла на трон, прынц Філіп на працягу 65 гадоў суправаджаў яе ў афіцыйных паездках і на мерапрыемствах, не лічачы шматлікіх сустрэч і сходаў, якія герцаг правёў у адзіночку, замяшчаючы сваю жонку.
Першым афіцыйным «сольным» мерапрыемствам Філіпа — тады яшчэ не прынца-кансорта, а проста мужа спадчыннай прынцэсы — стала наведванне баксёрскага бою ў Альберт-Холе ў 1948 годзе.
Улічваючы, што сам ён таксама з'яўляецца заснавальнікам, куратарам, членам папячыцельскай рады або ганаровым патронам некалькіх дзясяткаў дабрачынных арганізацый, нядзіўна, што за сваю «кар'еру» прынц Філіп узяў удзел у 22 218 афіцыйных мерапрыемствах — не лічачы тых выпадкаў, калі ён суправаджаў Лізавету.
22 219-м і апошнім стала яго сустрэча з вайскоўцамі, якія вярнуліся ў сераду з дабрачыннага марафону на выносліваць Global Challenge. Як генерал-капітан каралеўскіх марскіх пяхотнікаў, герцаг прыняў ўрачысты парад з гэтай нагоды.
Зрэшты, у Букінгемскім палацы ўдакладнілі: хоць з сённяшняга дня прынц Філіп афіцыйна «выходзіць на пенсію» і для яго больш не будуць планаваць асобных цырымоній, у будучыні ён па-ранейшаму можа часам суправаджаць сваю жонку на любых мерапрыемствах па ўласным выбары.
Працоўны графік каралевы Лізаветы II па-ранейшаму запоўнены разнастайнымі афіцыйнымі ўрачыстасцямі.
Лэдзі Міра Батэр, якая ведала прынца Філіпа яшчэ дзіцем — яны пазнаёміліся, калі яму не было і 10 гадоў, — распавяла, што памятае яго «жыццярадасным і вясёлым хлопчыкам».
«Я ўпэўненая, ён не прападзе [з віду], хоць нам усім будзе яго вельмі не хапаць», — сказала яна, адказваючы на пытанне аб тым, чым прынц зоймецца на пенсіі.
«Для ўсіх нас ён быў астраўком стабільнасці, заўсёды гатовым падтрымаць і прыйсці на дапамогу, і ён заўсёды падтрымліваў каралеву. Нам з ім вельмі, вельмі пашанцавала», — дадала лэдзі Батэр.
Калі ў маі гэтага года палац абвясціў аб хуткім выхадзе герцага на пенсію, прэм'ер-міністр Тэрэза Мэй выказала яму ад імя ўсіх брытанцаў «глыбокую падзяку і найлепшыя пажаданні».
Кіраўнік апазіцыі Джэрэмі Корбін таксама пажадаў прынцу усяго найлепшага на «заслужанай пенсіі».
Цяпер чытаюць
Уводзяць адказнасць за прапаганду гомасэксуальнасці, бяздзетнасці, а таксама за незаконнае прадстаўленне Беларусі на міжнароднай арэне8
Каментары