У Мінску адзін за другім прызямляюцца самалёты кіраўнікоў урадаў краін СНД.
Паседжанне прэм’ераў афіцыйна адбудзецца 31 мая, але фактычна, на думку выканаўчага сакратара Садружнасці Уладзіміра Гаркуна, саміт пачаўся сёння.
Большая частка ўдзельнікаў сустрэчы ўжо ў Менску, а кіраўнікі некаторых дэлегацыяў праводзяцьдвухбаковыя перамовы.
Уладзімер Гаркун на просьбу «Свабоды» прывёў раскладку кіраўнікоў дэлегацыяў паводле пасадаў. На саміце будуць шэсьць прэм’ераў, у тым ліку расейскі, украінскі, казахстанскі, два першыя намесьнікі прэм’ераў і два — намесьнікі. А вось Малдова абмежавала сваё прадстаўніцтва рангам віцэ-міністра замежных спраў і эўрапейскай інтэграцыі. Адначасова з самітам у Менску пройдзе і Форум дзелавых людзей СНД.
Нават сустрэча бізнэсоўцаў ня ўздыме цікавасьці да СНД, — упэўнены эканаміст Леў Марголін: «Тое, што, прынамсі ад Беларусі, тут будуць прысутнічаць прыдворныя прадпрымальнікі ці тыя, каго туды накіруюць па разнарадцы, — гэта адназначна.Думаю, што і зь іншых краін будуць пераважна бізнэсоўцы, якія ўжо працуюць у Беларусі.
Дакумэнты, якія падпісваюцца ў рамках СНД, ператварыліся ў такую звычку, якую трэба падпісаць штогод. Пра сапраўднае стаўленьне да СНД сьведчыць той факт, што Малдову на саміце прадстаўляе толькі намесьнік міністра. Гэта, я лічу, сумленная пазыцыя. Дый прадстаўніцтва віцэ-прэм’ераў шмат пра што кажа. СНД — такая рэч, якую і несьці цяжка, і кінуць шкада. Вось таму і доўжыцца гэта ўсё з году ў год».
З кім будзе сустракацца на двухбаковым роўні кіраўнік беларускага ўраду Міхаіл Мясьніковіч? Выканаўчы сакратар СНД на гэтае пытаньне адказаў так: «Я ня думаю, што я выдам нейкія сакрэты. Я ведаю, што будуць двухбаковыя сустрэчы нашага прэм’ера з кіраўнікамі дэлегацыяў Украіны, Таджыкістану, Армэніі і, безумоўна, Расейскай Фэдэрацыі».
Дарэчы, самалёт зь Дзьмітрыем Мядзьведзевым прылятае ў Менск заўтра апошнім. Магчыма, прычына тут аб’ектыўная — расклад палётаў, — заўважае палітоляг Алесь Лагвінец:
«Але іншая рэч — звыклыя паводзіны расейскіх кіраўнікоў: спазьняцца. Асабліва калі справа ідзе аб краінах СНД. Вядомыя зацяжныя спазьненьні Пуціна на сустрэчы з прадстаўнікамі СНД. Таму на гэта можна глядзець і ў рэчышчы агульнай культуры расейскай дыпляматыі, расейскіх кіраўнікоў.
І яшчэ адно пытаньне: наколькі СНД важная для Расеі? Мне падаецца, што для Расеі Садружнасьць так ці інакш застаецца важнай. Ніхто па сутнасьці і не аспрэчвае ўплыў і ролю Расеі ўнутры СНД. Таму, калі гэта ўсё скласьці, то і атрымліваецца, што расейцы прыяжджаюць апошнімі».
Упершыню менскі саміт пройдзе ў пяцізоркавым «Прэзыдэнт-гатэлі», пабудаваным на месцы зьнесенай савецкай гасьцініцы «Кастрычніцкая», насупраць рэзыдэнцыі Лукашэнкі. Кожнаму кіраўніку дэлегацыі адведзеныя трохпакаёвыя апартамэнты агульнай плошчай 140 квадратных мэтраў.
Харчавацца высокапастаўленыя чыноўнікі будуць у рэстарацыі «прэміюм-клясы», на самым версе будынка. Падымацца туды яны будуць на адмысловым ліфце для VIP-пэрсонаў.
Адзіна правільная тактыка для беларусаў падчас цяперашніх «выбараў» — берагчы сябе23
Каментары