Наталі Касцюшка-Марызэ прыме ўдзел у выбарчай кампаніі ў якасці кандыдата ў мэры французскай сталіцы.
У панядзелак, 3 чэрвеня, яна выйграла праймерыз сваёй партыі «Саюз за народны рух». Яе саперніцай на выбарах стане кандыдат ад Сацыялістычнай партыі Ана Ідальго. Абедзве жанчыны маюць шанцы выйграць выбары.
Наталі Касцюшка-Марызэ (Nathalie Kosciusko-Morizet) была міністрам пры Нікаля Сарказі, а да гэтага — дэпутатам парламента.
Яна мае беларускія карані і паходзіць з сям’і з вялікім палітычным мінулым. Далёкі продак Наталі Касцюшкі-Марызэ быў братам Тадэвуша Касцюшкі — кіраўніка паўстання 1794 г.
Дзед кандыдата ў мэры Парыжа Жак Касцюшка быў паслом Францыі ў ЗША, прадзед Андрэ Марызэ — сенатарам, бацька, Франсуа Касцюшка-Марызэ з’яўляецца мэрам Сеўра.
Наталі Касцюшка-Марызэ ад 2008 г. з’яўляецца мэрам горада Ланжумо, гарадка непадалёк ад Парыжа.
Пасада мэра сталіцы лічыцца адной з самых важных у Францыі. Ні разу за ўсю гісторыю Парыжа гэту пасаду не займала жанчына.
Гэта пасада з’явілася толькі ў 1977 годзе. Першым яе заняў Жак Шырак. Ён прабыў кіраўніком сталіцы да 1995 года, калі стаў прэзідэнтам Францыі. Зараз Парыжам кіруе Бертран Дэланаэ.
Цяпер чытаюць
35 маладых беларусаў і беларусак, за якімі варта сачыць: апублікаваны першы спіс Next 3524
Каментары