 |
26 і 27 кастрычніка ў Полацку пройдзе найбуйнейшы на тэрыторыі Беларусі рок‑фэст «Рок‑Кола». Арганізатар фэсту Сяргей Анішчанка: «Гэтым разам сусьветных зорак запрашаць ня будзем, але пэўна, што ўсё пройдзе сьціпла і з густам». Па традыцыі ў межах фэстывалю пройдзе конкурс маладых гуртоў і гала‑канцэрт. Госьці сёлетняга фэстывалю — «Крама», «Стая» і «Deimos».
Сяргей Анішчанка»Адна з маіх даўнішніх мараў зьдзейсьнілася летась, — кажа кіраўнік «Рок‑Кола« Сяргей Анішчанка. — У Полацку выступіла «Аліса». Таму сёлета мы вырашылі не замарочвацца на пошуку нейкай супэрзоркі, а засяродзіцца на маладых выканаўцах, бо найперш для іх гэты фэст задумваўся».
Па традыцыі — у межах «Рок‑Кола» пройдзе конкурс маладых гуртоў, куды можа трапіць кожны ахвочы. Пакуль аніякіх спэцыфічных патрабаваньняў да канкурсантаў арганізатары не выстаўляюць. Раней, напрыклад, адной з умоваў удзелу ў конкурсе была наяўнасьць хоць бы адной песьні па‑беларуску. Летась жа фэстываль быў прысьвечаны гурту «Мясцовы час», таму кожны выступоўца меўся прапанаваць свой кавэр твору знанай полацкай каманды.
 Сяргей Анішчанка |
«Мяне неаднойчы прасілі мясцовыя музыкі прысьвяціць гэты фэстываль Віктару Цою, некаторыя полацкія і наваполацкія каманды нават песьні яго ўжо адрэпэтавалі, аднак на гэты крок мы наўрад ці пойдзем, бо ня бачым тут сувязі з нашым фэстам», — апавядае Сяргей Анішчанка.
У якасьці гасьцей сёлетняга фэсту арганізатары плянуюць запрасіць леташняга пераможцу «Рок‑Кола» — гурт «Deimos» з Смаленску, гурт «Крама», які прэзэнтуе Полацку свой новы альбом «Жыцьцё — дзіўны сон», а таксама гурт «Стая». Удзел апошніх Аніса тлумачыць так:
«Надта любяць у нас у горадзе Кіпелава, чаму не пайсьці насустрач публіцы і не запрасіць музыкаў, што граюць у яго стылі».
Каментары