Асноўная віна за сакавіцкі фінансавы крызіс Кіпра ляжыць на экс-прэзідэнце краіны камунісце Дзімітрысе Хрыстафіясе, а таксама на яго ўрадзе, які не змог кантраляваць выдаткі і трымаўся «дэспатычнай» мадэлі кіраўніцтва краінай.
Да такой высновы прыйшла незалежная камісія па расследаванні прычынаў кіпрскага крызісу.
Матэрыялы расследавання, праведзенага трыма былымі суддзямі па замове цяперашняга правацэнтрысцкага ўраду, паказваюць, як пад кіраўніцтвам камуністаў у 2008 — пачатку 2013 г. бюджэтны прафіцыт краіны ператварыўся ў дэфіцыт, папоўз уверх ўзровень беспрацоўя, а Кіпр быў ізаляваны ад міжнародных фінансавых рынкаў.
У дачыненні да самога экс-прэзідэнта аўтары расследавання прыйшлі да высновы, што ён, не клапоцячыся пра наступствы, пагадзіўся на спісання па дзяржаблігацыях Грэцыі ў 2012 г., праз якія кіпрскія банкі панеслі велізарныя страты, а таксама не прыслухоўваўся да радцаў і дапусціў недаравальныя прамаруджанні ў справе атрымання міжнароднай дапамогі.
Сам Д. Хрыстафіяс адмовіўся сведчыць перад незалежнай камісіяй, падкрэсліўшы, што тая не мае адпаведных паўнамоцтваў. Ён таксама аператыўна адхіліў вынікі расследавання, назваўшы яго «поўным хлусні». Экс-прэзідэнт абвінаваціў супрацоўнікаў камісіі ў ігнараванні таго, што сам ён лічыць асноўнай прычынай крызісу: прагнасць банкіраў, якія пайшлі на празмерныя рызыкі, а таксама малаэфектыўная дзейнасць рэгулятараў.
«Гэтая камісія па-за законам, заключэнне поўнае няпраўды і паклёпу», — заявіў экс-прэзідэнт.
Камісія сапраўды не мае паўнамоцтваў органа выканаўчай улады, але можа стаць сур'ёзнай дапамогай у святле павелічэння ўзаемных абвінавачванняў у адказнасці за благі стан паслякрызіснай нацыянальнай эканомікі.
«Слушна прыйсці да высновы, што (былы) прэзідэнт і ўрад працавалі паводле прынцыпу «я ва ўрадзе, і я раблю тое, што хачу», — заявіў Джордж Пікіс, былы старшыня Вярхоўнага суда Кіпра, які ўзначаліў незалежную даследчую камісію.
Вынікі расследавання былі перададзеныя ўладам для разгляду.
Цяпер чытаюць
Закінутую сядзібу Багдановічаў пераробяць у буціковы гатэль ФОТЫ6
Каментары