Мінгарвыканкам паабяцаў падняць даплаты супрацоўнікам «хуткай» да 845 тысяч

У камітэце па ахове здароўя Мінгарвыканкама адзначылі, што ўсім супрацоўнікам службы хуткай медыцынскай дапамогі, якія працуюць па кантракце, прызначана штомесячная надбаўка да службовага акладу ў памеры 50%.У 2014 годзе яна будзе павялічана. У прыватнасці,

даплата лекарам і фельчарам, якія выязджаюць па выкліку самастойна, будзе павялічана да 6,5 базавай велічыні.

У камітэце па ахове здароўя таксама адзначылі, што

ствараецца камісія, якая разгледзіць пытанні, выкладзеныя ў звароце медработнікаў ў адрас адміністрацыі Гарадской станцыі хуткай медыцынскай дапамогі. Гэты зварот быў накіраваны 3 студзеня.

Нагадаем, подпісы пад петыцыяй работнікаў «хуткай дапамогі» да Лукашэнкі і міністра аховы здароўя Васіля Жарко збіраліся на інтэрнэт-пляцоўцы change.org. За два дні петыцыю, аўтары якой патрабавалі прадаставіць дадатковыя гарантыі медыцынскім работнікам, падпісала звыш пяці тысяч чалавек.

Акрамя таго, ініцыятары звароту апошнія дні актыўна зьбіралі подпісы непасрэдна сярод работнікаў сталічнай службы «хуткай дапамогі». Таксама збор подпісаў прайшоў у Брэсце і Баранавічах.

Аўтары звароту дамагаліся прыняцця закона «Аб хуткай медыцынскай дапамозе» і прапаноўвалі павысіць аклады работнікам «хуткай дапамогі» мінімум удвая.

Таксама яны патрабавалі, каб у заканадаўстве з'явіліся палажэнні аб забеспячэнні бяспекі медыцынскіх работнікаў, аб жыллёвых гарантыях, пенсійным забеспячэнні, страхаванні медыкаў ад няшчасных выпадкаў на працы на суму, якая можа пакрыць паўнавартаснае лячэнне, рэабілітацыю або шкоду сваякам у выпадку смерці медработніка.

У ліку патрабаванняў таксама была забарона на працу, калі медык апынуўся адзін у брыгадзе, узмацненне адказнасці ў выпадку нападу на супрацоўнікаў хуткай медыцынскай дапамогі

падчас выканання імі абавязкаў і стварэнне ў рэгіёнах навучальных баз для адпрацоўкі практычных навыкаў.

Увечары 7 студзеня петыцыя была знятая з сайту без тлумачэння прычын. Перад закрыццём доступу да петыцыі ініцыятар кампаніі Аляксей Іпатаў пакінуў паведамленне: «На жаль, мы вымушаныя закрыць пэтыцыю. Дзякуй, што падтрымлівалі нас ».

8 студзеня прадстаўнікі камітэта па ахове здароўя і станцыі хуткай меддапамогі сустрэліся з ініцыятарамі збора подпісаў, а Віталь Агеенка, які быў адным з арганізатараў зварота медыкаў, быў адпраўлены ў адпачынак за свой кошт.

Пра гэта паведамілі ў чацвер у дыспетчарскай службе 4-й падстанцыі хуткай меддапамогі Мінска.

• 0
• 0
• 0
• 0
• 0
• 0
• 0
• 0