Пачалася самая дарагая алімпіяда ў гісторыі

Алімпійскія гульні інтрыгуюць тым, хто з сусветных лідараў прыедзе ў Краснадарскі край, а хто прабайкатуе. Барак Абама, Ангела Меркель, Франсуа Аланд, Дэвід Кэмеран, Даля Грыбаўскайце не прыедуць на Гульні. Затое будзе Аляксандр Лукашэнка, якога два гады таму не паклікалі ў Лондан, і Віктар Януковіч.

Расійскія СМІ спрабуюць падаць, што байкот сусветнымі лідарамі Алімпіяды праходзіць праз тое, што ў Расіі забароненыя «аднаполыя шлюбы». Звыклы перавод стрэлак! Тое самае, напрыклад, робіць Лукашэнка, калі кажа, што Еўропа патрабуе ад Беларусі дазволу на гей-шэсці. Гэтак прыватнымі аспектамі замяняюць пытанні карупцыі, дэмакратыі і свабодаў.

Алімпіяда — гэта асабісты праект Пуціна. Увесь час кіравання гэтага чалавека прайшоў пад словамі «Расія ўстае з кален». У Сочы гэта павінна быць замацавана афіцыйна — устала. Пуціну гэтага вельмі б хацелася.

Аднак пакуль паведамленні з Сочы поўныя абсурду. Як тыя два ўнітазы без перагародак, што так насмяшылі і напалохалі свет.

Гэтая Алімпіяда будзе самай дарагой у гісторыі чалавецтва. Нават летнія Алімпійскія Гульні ў Пекіне абышліся танней. А параўноўваць з іншымі Зімовымі гульнямі ўвогуле не выпадае. Агулам на Сочы патрацілі каля 50 мільярдаў даляраў. Фантастычныя грошы.

Павялічыць

А яшчэ прагрымеў «выдатны» пароль да сочынскага «вай-фая» — «berlin1936». Гэта ў 1936 годзе Алімпіяду ў Берліне адчыняў Адольф Гітлер.

«Сочы — горад духоўнасці і дабра! Такім слоганам сустрэў нас горад! За два дні з трох крамаў нас спрабавалі падмануць у трох. На прэтэнзіі адказалі словамі: «А што, вы думалі, у казку патрапілі?» Цэны на таварах аказваюцца не сапраўдныя, а чэкавы апарат раптам ламаецца і, як потым аказваецца, сума прабітага стала ў 10 разоў большай, чым цана набытага! Добра мы, хоць ведаем, як разабрацца, а вось бедныя замежнікі, напэўна, і не заўважаць, што іх падманулі», — так незадоўга да Алімпіяды апісвае сочынскія рэаліі беларуская біятланістка Надзея Скардзіна.

Другое важнае пытанне, якое хвалюе свет. Ці будзе Алімпіяда ў Сочы бяспечнай, ці не спраўдзяцца самыя чорныя прагнозы?

Бяспека на Алімпіядзе будзе неймаверная. Зноўку ж даходзіць да абсурду — у Алімпійскую вёску нельга праносіць прадукты ў шкле. Спартсмены будуць абавязкова праходзіць праз металашукальнік.

Усё ж трэба сказаць некалькі словаў уласна пра спорт. Беларусь на Алімпіядзе прадставіць рэкордна нізкая колькасць атлетаў — 27. Хакеісты падарылі пуцёўку Славеніі. Некалі беларус Ігар Жалязоўскі браў срэбра ў каньках на Алімпіядзе ў Ліліхамеры, а сёння канькабежцы нават не змаглі заваяваць ніводнай ліцэнзіі. Няма нашых і ў фігурным катанні.

Калі казаць проста, то наш інтарэс зводзіцца да двух пунктаў праграмы — жаночага біятлона і мужчынскага фрыстайла (хай прабачаць іншыя ўдзельнікі беларускай дэлегацыі).

У біятлоне мы маем унікальную Дар’ю Домрачаву — саму хуткую біятланістку свету.

Калі Дар’я добра адстраляецца, то медалёў павінна быць многа. У Надзеі Скардзіны — іншы плюс, яна выдатны стралок, а вось бегае яна павальнавата. У інтэрнэце жартуюць: вось бы неяк аб’яднаць хуткасць Домрачавай і трапнасць Скардзіны. Можа, нешта і ўдасца ў эстафеце.

Фрыстайл — гэта ўвогуле беларускі феномен.

Некалі ў СССР гэты від спорту сталі развіваць якраз у Беларусі, на базе акрабатычнай школы. Дзякуючы геніяльнаму трэнеру Мікалаю Казеку, поспехі аказаліся ашаламляльнымі. Чатыры Алімпіяды запар (!) мы бралі медалі ў гэтым відзе праграмы. Сёлета незвычайна моцныя кітайцы, расейцы перацягнулі нашага Цімоха Сліўца, але ўсё адно Аляксей Грышын, Дзмітрый Дашчынскі, Антон Кушнір у ліку галоўных прэтэндэнтаў на медалі.

Беларуская дэлегацыя ў Сочы

Біятлон (10 спартсменаў) —Дар'я Домрачава, Надзея Скардзіна, Людміла Калінчык, Настасся Дубарэзава, Надзея Пісарава; Сяргей Новікаў, Яўген Абраменка, Юрый Лядаў, Уладзімір Чапелін, Аляксандр Дарожка.

Фрыстайл (7) —Аляксей Грышын, Дзмітрый Дашчынскі, Антон Кушнір, Дзяніс Осіпаў; Ала Цупер, Ганна Гуськова, Вольга Капусціна.

Лыжныя гонкі (6) —Сяргей Далідовіч, Аляксандр Лазуткін, Міхаіл Сямёнаў, Аляксей Іваноў; Алена Саннікава, Валянціна Камінская.

Горныя лыжы (2) —Юры Данілачкін; Марыя Шканава.

Шорт-трэк (2) —Максім Сяргееў; Вольга Талаева.

• 0
• 0
• 0
• 0
• 0
• 0
• 0
• 0