Прысуд Зьмітру Дашкевічу: 60 базавых велічыняў штрафу
У залю суду пусьцілі толькі адваката і прадстаўніка місіі АБСЭ. Нават бацька Зьмітра застаўся на вуліцы: "Абвінаваўчы прысуд ня робіць гонару ўладам, але гэта лепш, чым сядзець шэсьць месяцаў".
12:52. Як заявіў у камэнтары "НН" бацька палітвязьня Вячаслаў Дашкевіч: "Абвінаваўчы прысуд ня робіць гонару ўладам, але гэта лепш, чым сядзець шэсьць месяцаў. Каб сплаціць штраф, нам з жонкай давялося б прадаць усю гаспадарку. Але я перакананы, што выплаціць штраф дапамогуць сябры і знаёмыя Зьмітра, якіх у яго вельмі шмат".
Вячаслаў Дашкевіч таксама сказаў, што маці Зьмітра пакуль ня ведае пра прысуд, бо пакуль да яе не датэлефанаваліся.
У сваім апошнім Зьміцер яшчэ раз пацьвердзіў, што не зьбіраецца сьведчыць супраць сябе і сваіх сяброў.
Між іншым, Зьміцер Дашкевіч павінен выйсьці на воллю за дзесяць дзён да Дня волі, 15 сакавіка.
12.19. Судовы працэс аказаўся надзіва хуткім. Судзьдзя Кашкіна прызнала Зьмітра вінаватым у парушэньні артыкулу 402 КК, пакараўшы яго 60 базавымі велічынямі штрафамі (1 мільён 860 тысяч рублёў).
Падчас слуханьняў быў заслуханы адзін сьведка, які і дапытаў Зьмітра.
11.27. На працэс пусьцілі таксама прадстаўніка місіі АБСЭ, які перад гэтым накіраваў ліст з просьбай прысутнасьці на судзе міністру ўнутраных справаў Уладзімеру Навумаву.
Пад сьценамі турмы цяпер знаходзяцца каля 25 чалавек. Яны апранулі майкі з партрэтам Зьмітра Дашкевіча. Частка людзей стала ў кола і моліцца.
Журналіст тыднёвіка "Белорусы и рынок" Генадзь Барбарыч накіраваў запыт начальніку шклоўскай калёніі Валер'ю Ільюшэнку, каб журналістаў пусьцілі на працэс. Цяпер гэты запыт разглядае Дэпартамэнт па выкананьню пакараньняў. Ёсьць шанец, што прадстаўнікоў СМІ пусьцяць хаця б на агалошваньне прысуду.
10:09. Суд над Зьмітром Дашкевічам пачаўся. У быдынак калёніі пусьцілі толькі адваката Аляксандра Галіева. Адмовілі ў прысутнасьці на працэсе нават бацьку Зьмітра Вячаславу Дашкевічу, які зноў прыехаў у Шклоў са Старых Дарог.
Пад дзьвярыма турмы цяпер знаходзяцца дваццаці чалавек. Большасьць зь іх складаюць маладафронтаўцы і журналісты. Прыехаў прадстаўнік місіі АБСЭ, які дамагаецца прысутнасьці на судзе. Усіх прысутных здымаюць на камэру людзі ў цывільным.
***
У Шклове а 10-й раніцы пачаўся суд над маладафронтаўцам.
Суд над Зьмітром мусіў распачацца 6 лістапада, але быў перанесены з фармальнай прычыны. Паводле заканадаўства абвінавачаны мусіць атрымаць паведамленьне пра прызначэньне судовага працэсу не пазьней як за 5 сутак да яго пачатку. Зьміцер даведаўся пра гэта 1 лістапада і на раніцу 6 лістапада поўных пяць сутак не мінула.
Зьміцер Дашкевіч абвінавачваецца паводле арт. 402 КК «Адмова альбо ўхіленьне сьведкі ад даваньня паказаньняў». Летам Зьміцер катэгарычна адмовіўся даваць паказаньні супраць сваіх сяброў з «Маладога фронту», у прыватнасьці супраць Івана Шылы. Паводле гэтага артыкулу Дашкевіч можа атрымаць яшчэ паўгоду турмы.
Цяпер Зьміцер Дашкевіч адбывае паўтарагадовае зьняволеньне ў шклоўскай папраўчай калёніі. Яго асудзілі 1 лістапада 2006 г. за ўдзел у незарэгістраванай арганізацыі. На волю хлопец мусіў выйсьці 15 сакавіка.
Каментары