Міністр замежных спраў Расіі Сяргей Лаўроў заявіў, што крызіс ва Украіне можа быць вырашаны толькі шляхам прамых перамоў аб будучым дзяржаўным ладзе краіны, а падпарадкаваць паўднёвы ўсход Кіеву не ўдасца.
Такое меркаванне ён выказаў падчас прэс-канферэнцыі ў Ерэване.
«Краіна перажывае глыбокі крызіс дзяржаўнасці, і падавіць адну частку краіны, падпарадкаваць яе волі іншай не ўдасца. А калі атрымаецца, то не дазволіць дасягнуць устойлівага рэгулявання», — заявіў Лаўроў.
Паводле яго слоў, толькі прамыя перамовы змогуць «забяспечыць такі дзяржаўны лад Украіны, які дазволіць гарантаваць роўныя правы і свабоды грамадзянам ва ўсіх рэгіёнах краіны».
Кіраўнік ведамства падкрэсліў, што Расія працягвае дамагацца пачатку агульнанацыянальнага дыялогу, а таксама ўносіць у гэтыя намаганні «непасрэдны і зацікаўлены унёсак».
Ён адзначыў, што выратаванне жыццяў людзей, а таксама расійскіх журналістаў з'яўляецца для Расіі прыярытэтным.
Лаўроў таксама пракаментаваў пытанне журналістаў пра сувязі паміж некаторымі прадстаўнікамі расійскіх палітычных колаў і кіраўніцтвам самаабвешчаных Данецкай і Луганскай рэспублік.
Міністр патлумачыў гэта наяўнасцю агульных каранёў — «каля 90% істэблішменту выйшла з адной краіны — Савецкага Саюза».
Цяпер чытаюць
Беларус, які ваяваў за Украіну, распавёў, чым яго зачаравала каханка Іна Кардаш, агентка КДБ29
Каментары