У Гомельскім судзе адмовіліся весці па-беларуску працэс па справе аб адлічэнні маладафронтаўца з універсітэта

Суддзя Цэнтральнага раёна Гомеля Вольга Казлова, якая разглядае іск сустаршыні «Маладога фронту» Андрэя Цянюты да рэктарата Гомельскага дзяржаўнага ўніверсітэта імя Францыска Скарыны, перанесла суд на 16 верасня з-за таго, што Цянюта запатрабаваў весці працэс па-беларуску або прадставіць перакладчыка.

Павялічыць

Сустаршыня «Маладога фронту» абскарджвае ў судзе незаконнае, на яго погляд, адлічэнне з ВНУ. 

У судзе Цянюта адразу заявіў хадайніцтва, каб яго справа вялася на беларускай мове. Суддзя запярэчыла: у краіне дзве дзяржаўныя мовы і справаводства ў судах вядзецца на рускай. Тады маладафронтавец запатрабаваў перакладчыка, бо яго родная мова — беларуская.

Цянюта лічыць сваё адлічэнне з ВНУ палітычна матываваным. «Я падаў скаргу ў суд на свой універсітэт імя Францыска Скарыны, з якога я быў адлічаны за два адміністрацыйныя спагнанні. Яны спасылаюцца на Кодэкс аб адукацыі. Але гэта палітычны пераслед, калі студэнта адлічваюць цалкам палітычна матывавана. Калі б гэта быў нейкі Вася Пупкін, які выпіў лішняга, яго два разы затрымалі, упэўнены, што яму б нічога не зрабілі. Як вядома, у нас у Беларусі права працуе выбарачна. Калі чалавек перашкаджае ўладзе, яго рэпрэсуюць — штрафуюць, садзяць і гэтак далей. Але калі ён лаяльны да ўлады, то могуць толькі пальцам паківаць», — заявіў ён.

Андрэй Цянюта вучыўся на трэцім курсе завочнага факультэта на спецыяльнасці «Правазнаўства». Вучыўся на платнай аснове. Няздадзеных залікаў і экзаменаў не меў. Меў толькі апошнім часам два адміністрацыйныя спагнанні за грамадскую і палітычную дзейнасць. За распаўсюджванне антыалкагольных улётак і нібыта за тое, што брыдкасловіў на пустыннай вуліцы, «чым парушаў парадак і спакой грамадзянаў». Апошняе затрыманне было перад пачаткам чэмпіянату свету па хакеі ў Мінску, калі актывістаў «зачышчалі» і ў іншых рэгіёнах краіны:

«Гэта, хутчэй за ўсё, замаўляе ўлада ці, магчыма, Камітэт дзяржаўнай бяспекі. Проста хочуць выціснуць з Беларусі», — мяркуе маладафронтавец.

Кіраўнік рэгіянальнай структуры «Прававая ініцыятыва», юрыст Леанід Судаленка, якога Цянюта ў суд запрасіў як прадстаўніка грамадскасці, кажа, што ні Кодэкс аб адукацыі, ні правілы ўнутранага распарадку ўніверсітэта не ўтрымліваюць патрабавання адлічваць студэнта за адміністрацыйныя парушэнні. «Калі суд дапусціць мяне прадстаўніком грамадскасці, я буду гаварыць пра гэта: няма ва ўніверсітэта падставаў адлічваць Цянюту, спыняць яго вучобу. Тым больш што ён — студэнт-завочнік, навучаецца за свой кошт», — адзначыў ён.

На судзе прысутнічаў і праваабаронца, дацэнт універсітэта імя Францыска Скарыны Віктар Адзіночанка. «Кажу зараз менавіта як выкладчык гэтага ўніверсітэта. Ініцыятыва на адлічэнне Цянюты — гэта не ініцыятыва ўніверсітэта. Ні рэктару, ні дэкану завочнага факультэта гэтае адлічэнне не патрэбнае. Безумоўна, што ўніверсітэт будзе абараняць сваю пазіцыю, але гэта не яго пазіцыя. У нас ёсць жорсткая ўстаноўка, каб студэнтаў, асабліва завочнікаў, якія плацяць за сваю адукацыю, не адлічваць. Толькі калі ён сам напіша заяву», — заявіў Адзіночанка.

Афіцыйны прадстаўнік універсітэта Валерый Нядоступ сваёй пазіцыі ў судзе пакуль не выказваў, бо разгляд справы перанесены. Вядомая толькі пазіцыя Міністэрства адукацыі, куды звяртаўся Цянюта. Першы намеснік міністра Вадзім Богуш адказаў студэнту-завочніку, што адлічаны той правамерна.

• 0
• 0
• 0
• 0
• 0
• 0
• 0
• 0