Прарасійскія баевікі паспрабавалі здзейсніць прарыў у Луганскай вобласці: загінулі тры ўкраінскія сілавікі
Сёння ў Станіцы Луганскай (гэта райцэнтр Луганскай вобласці) група баевікоў спрабавала прарвацца на тэрыторыю, якая знаходзіцца пад кантролем Украіны.
У сярэдзіне дня, прыкладна з 13:40, баевікі вялі люты артабстрэл пасёлка Станіца Луганская. Былі чуваць залпы з мінамётных установак і сістэм залпавага агню «Град».
«Каля 14:30 у раёне чыгуначнага пераезда група баевікоў здзейсніла спробу прарыву на тэрыторыю, кантраляваную законнай украінскай уладай», — паведамілі ў прэс-службе Міністэрства ўнутраных спраў Украіны.
У ходзе бою загінулі два супрацоўнікі батальёна патрульнай службы міліцыі спецыяльнага прызначэння «Чарнігаў». Яшчэ адзін міліцыянт пазней памёр у шпіталі. Пяцёра праваахоўнікаў атрымалі раненні.
«Вораг панёс страты і быў адкінуты. Міліцэйскі гарнізон працягвае выкананне баявых задач па барацьбе з тэрарыстамі, а таксама па падтрыманні законнасці і правапарадку», — дадалі ў прэс-службе.
Каментары