2008 год беларускі дуэт Аляксандра і Канстанцін сустрэў на замежных гастролях. 31 сьнежня артысты павіншавалі з Новым годам жыхароў Баўгарыі са сцэны, усталяванай на цэнтральным пляцы Варны
Навагодні канцэрт праходзіў пры шматтысячнай аўдыторыі. Пасьля шыкоўнага сьвяточнага фаервэрку пачалася музычная праграма, якая доўжылася да 5 раніцы. Былі запрошаныя ўсе зоркі Баўгарыі, а таксама выканаўцы з Румыніі і ЗША. Канцэрт трансьляваўся ў жывым этэры баўгарскага тэлебачаньня.
Уражаньнямі ад навагодняга выступу падзяліўся Канстанцін Драпеза:
«Нашая праграма была разьлічаная на паўгадзіны. Мы выканалі як беларускамоўныя кампазыцыі, так і песьні на ангельскай мове. Прыемна было бачыць, што слухачам зразумелая наша мова. Дзіўна, але менавіта падчас нашага выступу пайшоў дождж, хоць нішто гэтага не прадвесьціла. Уражаньняў шмат, мы ж упершыню сустрэлі Новы год не на роднай зямлі».
Не абыйшлося і безь неспадзяванак. У мінулую паездку ў Канстанціна скралі гаманец. У гэты раз артыстам прыйшлося затрымацца на некалькі дзён з‑за нялётнага надвор’я:
«Гэта была сапраўдная стыхійная бядота — наймацнейшы сьнегапад і вецер, — распавядае Канастанцін, — Мы змушаныя былі вяртацца дахаты праз Бургас і Вену і правесьці цэлых 15 гадзінаў у аэрапорце. Тым ня менш, мы не засмуціліся, а паставіліся да гэтага як да навагодняй прыгоды. У гэтыя дні мы пасьпелі даць два дадатковыя канцэрты».
Музыкі адзначаюць, што на гэтым іх супрацоўніцтва з баўгарскім бокам не сканчаецца. Беларускаму дуэту паступіла некалькі пэрспэктыўных прапановаў, якія будуць рэалізаваныя ўвесну. А пакуль, па вяртаньні дахаты, Аляксандра і Канстанцін рыхтуюцца да выпуску на лэйбле West Records свайго першага канцэртнага DVD.
Што за Дзмітрый Скіндзераў, які абвясціў вайну Ціханоўскай? Супрацоўніцтва з ГУБАЗіКам, даўгі ў Беларусі, даўгі ў Літве34
Каментары