15 мая 2015 года адбылося адкрыццё новага офіса кампаніі «Сістэмныя тэхналогіі». Офіс атрымаўся досыць незвычайны. Вядома ж, у ім ёсць і звыклыя сталы, і крэслы, праграмісты не туляцца ў капсулах і не загружаныя ў матрыцу, аднак ужо з першых крокаў і супрацоўнікі, і наведвальнікі трапляюць у захапляльны свет беларускай культуры.
На рэсэпшэн нас сустракае вялікая глянцавая шыльда «Сістэмныя тэхналогіі». І на гэтым урок беларускай мовы толькі пачынаецца. Творчую энергію можна чэрпаць проста ля ўваходу, дзе знаходзіцца пано з россыпам беларускіх слоў «развіццё, якасць, дасягненне, вышыня, творчасць» — сапраўдная «сцяна натхнення». Цікаўнаму даследніку ў офісе таксама ўдасца знайсці «пакой для генерацыі ідэй», «карчму», «пакой бадзёрасці», «працоўню», «пункт тэлефоннай сувязі» і запаветны пакой «кава ці гарбата».
«Задумаўшыся аб праекце новага офіса, мы не проста хацелі стварыць новыя працоўныя месцы для супрацоўнікаў нашай кампаніі, — паведаміў генеральны дырэктар кампаніі Аляксандр Мукавозчык. — Перад намі стаяла больш важная мэта — абраць кірунак нашага развіцця на будучыню і стаць прыкладам для іншых ІТ-кампаній. У нашым офісе ёсць вельмі важны складнік: павага да краіны, у якой мы працуем, і яе культурных традыцый. Менавіта таму асноўная мова, якую мы выкарыстоўвалі ва ўнутранай навігацыі — беларуская».
У офісе кампаніі «Сістэмныя тэхналогіі» можна не толькі ўспомніць родную беларускую мову, але і здзейсніць падарожжа па самых вядомых славутых мясцінах нашай краіны. Кожны пакой для перамоў у офісе носіць імя аднаго з культурных цэнтраў Беларусі, а ў самім пакоі можна палюбавацца гістарычнымі славутасцямі нашай краіны. Тут Вас чакаюць Мірскі і Нясвіжскі замкі, палацы ў Ружанах, Гальшанах і Косава.
«Да нас у госці часта прыязджаюць замежныя партнёры, але, на жаль, з прычыны шчыльнага графіка сустрэч ім рэдка ўдаецца наведаць славутасці нашай краіны. Цяпер мы зможам знаёміць нашых гасцей з культурным багаццем Беларусі адразу ў нашым офісе», — дадае генеральны дырэктар. Новы офіс кампаніі «Сістэмныя тэхналогіі» — гэта яшчэ і пацверджанне таго, што тэндэнцыя «офіс як дом», якая атрымала такое шырокае распаўсюджванне ў офісах такіх ІТ-гігантаў, як Google, Facebook, Microsoft, усё больш актыўна выкарыстоўваецца і ў нас у краіне.
«Камфорт і сучаснасць — вось два асноўныя кірункі, якімі мы ішлі ў працэсе рэалізацыі праекта, — распавядае намеснік генеральнага дырэктара Аляксандр Жукоўскі. — Офіс ІТ-кампаніі 21 стагоддзя — гэта ўжо не проста працоўныя месцы, абсталяваныя камп'ютарамі, гэта паўнавартасны комплекс, дзе супрацоўнік можа знайсці ўсё неабходнае для яго камфортнай працы і адпачынку: кухня, пакоі для перамоў, пакоі для тэлефанавання, душавая, трэнінг-цэнтр. Яшчэ раз адзначу культурны складнік нашага інтэр'ера. Мы працуем у Беларусі, наша краіна — адзін з лідараў у развіцці ІТ-прадуктаў і паслуг у свеце».
Цяпер чытаюць
Былы беларускі міліцыянер шукае «пародзістую прыгажуню». Называе сябе мільянерам, а сам судзіцца з былой жонкай за аліменты6
Каментары