З бактэрый і іх газаў адказнасць знятая.
Навукоўцы швейцарскай дзяржаўнай арганізацыі Agroscope абверглі уплыў бактэрый на памер і колькасць дзір у сыры, паведамляе The Guardian.
Даследаванне паказала: дзіры ў сыры ўтвараюцца праз трапленне ў малако мікраскапічных часцінак сена.
Каля 98 год лічылася, што дзіры ў сыры робяць бактэрыі. Да такой высновы прыйшоў у сваім даследаванні 1917 года амерыканец Уільям Кларк. Паводле яго высноў, бактэрыі пачыналі размнажацца пасля кісламалочнага браджэння і выпрацоўвалі вуглякіслы газ, што застываў у сыры.
Швейцарцы заўважылі, што за апошнія 10-15 год памер і колькасць дзір у такіх сырах як «Эменталь» і «Апенцэль» зменшылася, хаця тэхналогія іх вырабу не мянялася радыкальна. Але за апошні час швейцарцы перайшлі ад ручной дойкі кароў да аўтаматычных сістэм.
Навукоўцы праверылі гіпотэзу аб тым, што на колькасць і памер дзір уплываюць прымесы ў малаку саламянага пылу і мікрачасцінак сена, што ў меншай колькасці трапляюць у малако пры аўтаматызаванай дойцы.
Праз рэгуляванне памеру часцінак сена ў малацэ навукоўцы здолелі кіраваць колькасцю і аб’ёмам дзір у канчатковым прадукце. Гэта пацвердзіла гіпотэзу, але не дала адназначнага тлумачэння поўнага механізму ўзнікнення дзір у сыры.
Цяпер чытаюць
Пагражаў вайскоўцам раскрыць, хто з іх гомасэксуал, каб выпытаць сакрэты і прадаць Украіне. Вось за што адыёзны функцыянер БРСМ атрымаў 17 гадоў калоніі1212
Каментары