У Падмаскоўі прызыўнік уключыў гімн Украіны ў ваенкамаце

Улад Калеснікаў, 17-гадовы хлопец з Падольска (Расія) набірае папулярнасць і набывае праблемы праз сваю прынцыповую антываенную пазіцыю.

«Пуцін сядзіць са сваёй зграйкай крымінальнікаў і краінай запраўляе, прычым з дапамогай магутнай прапаганды, — распавядае ён расійскаму аддзяленню «Радыё Свабода». — Гэта маё суб'ектыўнае меркаванне. Можа быць, я памыляюся, але я лічу, што яно правільнае».

Аднойчы Улад прыйшоў у вучэльню з украінскім сцяжком, налепленым на футболку. На сцяжку было падпісана: «Вярніце Крым».

Пабіць, закапаць, заваліць на экзаменах — чаго яму толькі не абяцалі за сцяжок. Праз пэўны час пагрозы спраўдзілі: на Улада напалі з кулакамі (сам ён кажа, што гэта нельга называць словам «збілі» — слабавата), а затым і выключылі з вучэльні «па ўласным жаданні».

Праз антываенную пазіцыю ён пасварыўся і з роднымі, у тым ліку з дзедам, у якога жыў. Дзед адаслаў унука да бацькі ў іншы горад. «Ты мой вораг. Ты аддаў краіну, ты падтрымаў хахлоў, ты, малалетні дурань, не разумееш што ЗША выкарыстоўвае іх як гарматнае мяса, каб заваліць Пуціна. Ты пагроза мне і маёй сям'і. За табой прыйдуць», — казаў Уладу родны дзед.

Улад кажа, што з’ехаў своечасова: калі патэлефанаваў дзеду, каб сказаць, што даехаў нармальна, той распавёў, што ў старую кватэру ўжо прыходзіла паліцыя і пытала, дзе Улад узяў сцяжок ды дзе футболка цяпер. У хуткім часе Улад даведаўся пра выключэнне з вучэльні «па ўласным жаданні».

«Антываенная гісторыя» Улада пачалася раней за сцяжок: ён дэманстратыўна адмовіўся служыць пад гукі гімна Украіны.

Да таго хлопец з сябрам неаднаразова ладзіў акцыі пратэсту ў родным Падольску. У межах апошняй хлопцы вывесілі на даху аднога з дамоў плакат з надпісам «*** вайне».

Па словах Улада, ён не годны да вайсковай службы праз кепскі зрок, але ён «паспяхова» прайшоў медкамісію. Перад тым, як зайсці да прызыўной камісіі, ён уключыў на тэлефоне гімн Украіны. «Рабяты, я не пайду ваяваць у расійскую армію», — заявіў ён камісіі.

«Расійскі гімн мне не падабаецца, таму што я лічу яго хлуслівым, — тлумачыць Улад. — Усё, што там гаворыцца пра свабоду і гэтак далей, — гэта проста брахня чыстай вады».

У адказ на адмову служыць перад Уладам паклалі два акты: адзін пра тое, што ён мае праблемы са зрокам, а другі пра «расстройства асобы» — хлопца запісалі ў вар’яты.

Уладу прапануюць з’ехаць у Кіеў, але ён не хоча пакідаць Расію і плануе зладзіць пікеты пратэсту ў Маскве.

«Гэта самы крайні варыянт, — кажа Улад пра пераезд за мяжу. — Калі хто-небудзь думае, што я зараз пасяджу, зраблю замежны пашпарт, паеду ва Украіну і на гэтым усё скончыцца, то яны памыляюцца».

• 0
• 0
• 0
• 0
• 0
• 0
• 0
• 0