Юрый Шульган вызвалены, яго адміністрацыйны пратакол адпраўлены на перагляд
Суд Ленінскага раёна Мінска адправіў на перагляд адміністрацыйны пратакол у дачыненні да 38-гадовага беспрацоўнага Юрыя Шульгана, які прэтэндуе на пасаду прэзідэнта Беларусі.
Шульган быў затрыманы вечарам 18 чэрвеня ў кватэры свайго сябра ў Ленінскім раёне Мінска. Пакінуўшы сёння будынак суда, ён сказаў БелаПАН, што міліцыянеры «фактычна не выставілі ніякіх абвінавачанняў». «Проста прыехалі на кватэру сябра, забралі мяне і пратрымалі ноч у камеры», — сказаў Шульган.
Раніцай 19 чэрвеня, паводле слоў Шульгана, яго даставілі ў суд, дзе суддзя ўдакладніў яго пашпартныя даныя і паведаміў, што складзены на яго адміністрацыйны пратакол будзе перагледжаны. У чым канкрэтна яго першапачаткова вінавацілі, Шульган так і не ўдакладніў. З пратаколам ён не азнаёміўся, бо «быў шчаслівы, што яго так хутка вызвалілі».
Раней кіраўнік перадвыбарнага штаба Шульгана Павел Канавальчык меркаваў, што прычынай затрымання маглі стаць нявыплачаныя штрафы па адміністрацыйных правапарушэннях, але сам Шульган так не думае.
Ён пацвердзіў, што мае вялікую колькасць нявыплачаных штрафаў, у тым ліку за распіванне спіртных напояў у грамадскім месцы і безбілетны праезд. Аднак, на думку Шульгана, калі б справа была ў нявыплачаных штрафах, то яго не адпусцілі б з суда, а пакаралі б адміністрацыйным арыштам, як гэта было прыкладна год таму. Тады, сказаў беспрацоўны, за нявыплату шматлікіх штрафаў яго асудзілі на 10 сутак арышту.
Затрыманне Шульган звязвае са сваёй грамадскай актыўнасцю і намерам удзельнічаць у прэзідэнцкіх выбарах.
Нагадаем, на прэс-канферэнцыі 20 мая Юрый Шульган заявіў, што штуршком, які прымусіў яго вылучацца кандыдатам у прэзідэнты, стала прыняцце нашумелага дэкрэта № 3 аб прадухіленні сацыяльнага ўтрыманства. Паводле слоў Шульгана, ён вырашыў вылучацца кандыдатам у прэзідэнты «не з-за зарплаты, а з пачуцця адказнасці за дармаедаў».
Выкладчык гісторыі па адукацыі, Шульган апошнія 15 гадоў не працуе. «Я не магу ў сённяшняй краіне выкладаць рэальную гісторыю, а ашукваць дзяцей я не магу» — так ён тлумачыць свой статус беспрацоўнага.
-
Мінчук зняў ролік пра чаргу ў паліклініцы, дзе было больш за 150 чалавек. За гэта на яго напісалі заяву ў міліцыю
-
Юліяна Шаметавец з «Кіберпартызанаў» стала маці — расказвае пра дэкрэтны адпачынак у ЗША і тое, ці сапраўды можна сумяшчаць працу з мацярынствам
-
Каверын выбачыўся за прапанову эратычнай фотасесіі для Ціханоўскай
Мінчук зняў ролік пра чаргу ў паліклініцы, дзе было больш за 150 чалавек. За гэта на яго напісалі заяву ў міліцыю10
Каментары