BuzzFeed: Пентагон закупіў для сірыйскіх паўстанцаў беларускія процітанкавыя ракеты
700 магутных процітанкавых ракет для сірыйскіх паўстанцаў былі набытыя ў Беларусі за грошы амерыканскіх падаткаплацельшчыкаў. Пра гэта гаворыцца ў расследаванні журналістаў BuzzFeed (аднаго з найбуйнейшых амерыканскіх навінавых парталаў).
Па дадзеных выдання, Пентагон закупляе зброю для паўстанцаў праз малюсенькую, малавядомую прыватную кампанію Purple Shovel LLC.
Такім чынам, ЗША парушылі сваю ўласную палітыку і далі Purple Shovel LLC адабрэнне на куплю «высокатэхналагічных ракет для паўстанцаў» з Беларусі.
Рэч у тым, што Дзярждэп ліцэнзуе кожную здзелку з удзелам амерыканскіх кампаній і ёсць спіс краін з абмежаваннямі па гандлі зброяй, у які ўваходзіць і Беларусь.
«Беларусь, якую абвінавачваюць у парушэннях правоў чалавека, як правіла, закрыта для амерыканскіх гандляроў зброяй. Але ваенныя ЗША і Дзяржаўны дэпартамент пагадзіліся зрабіць выключэнне, дазволіўшы за сродкі амерыканскіх падаткаплацельшчыкаў закупіць 700 магутных процітанкавых ракет «Конкурс» для паўстанцаў» — адзначае выданне.
BuzzFeed таксама нагадвае, што Беларусь, разам з Расіяй, Іранам і Паўночнай Карэяй з'яўлялася найбуйнейшым прадаўцом зброі рэжыму Башара Асада з 2006 па 2010 год.
Супрацьтанкавыя ракеты «Конкурс» здольныя паражаць цэлі на адлегласці да 4 км. Яны могуць прабіць браню да 250 мм таўшчынёй, што робіць іх эфектыўным зброяй супраць танкаў. «Конкурс» распрацавалі ў СССР у пачатку 1970-х, але мадыфікацыя «Конкурс-М» прынятая на ўзбраенне параўнальна нядаўна — у 1991 годзе. Такія ракеты вырабляюцца, у тым ліку, у Індыі і ў Іраку.
Цяпер чытаюць
Арына Сабаленка выйшла да мінчукоў у атачэнні васьмі ахоўнікаў ВІДЭА17
Каментары