Хто ўзначаліў Міністэрства гандлю? Пяць фактаў пра Уладзіміра Калтовіча 

Сёння Аляксандр Лукашэнка падпісаў указ аб прызначэнні членаў урада. Сярод урадоўцаў змяніўся толькі адзін чалавек. Замест Валянціна Чаканава міністрам гандлю стаў 49-гадовы Уладзімір Калтовіч,

хоць многія чакалі, што ведамства ўзначаліць сённяшняя намесніца Ірына Наркевіч.

Калтовіч працаваў намеснікам міністра у перыяд 2009—2010 гадоў.

За апошні год Міністэрства гандлю стала адным з найбольш пазнавальных у медыя, іх праверак баяцца крамы і кавярні. «НН» прыглядзелася, хто ж узначаліў Мінгандлю.

Працаваў дарадцам-пасланнікам у пасольстве Беларусі ў Расіі

Павялічыць

Апошнім месцам працы Уладзіміра Калтовіча было беларускае пасольства ў Маскве. Там чыноўнік адпрацаваў тры гады – ад снежня 2012 года. Курыраваў якраз пытанні гандлю.

«На з'ездзе «Саюзмалако» спадар Анішчанка сказаў, што Мытны саюз — гэта перш за ўсё рынак. Гэта падкрэслівае жаданне Новай Зеландыі ў любым варыянце атрымаць доступ на гэты малочны рынак. У сувязі з гэтым пытанне — «Каму тут прадаваць?» — становіцца найважнейшым». Казаў Калтовіч з ноткай крыўды, што беларускае малако трапляе на расійскі рынак зусім не ў тых аб’ёмах, на якія спадзяваўся Мінск.

Яшчэ Калтовіч адзначаў, што ледзьве не кожны пяты беларускі кантракт заключаецца ў Расіі з махлярамі. І ў 2015 годзе сітуацыя з гэтым заўважна пагоршала.

Родам з Чэрвеня, працаваў ва ўнівермагу «Беларусь»

Уладзімір Калтовіч нарадзіўся 1 кастрычніка 1966 у Чэрвені. Скончыў БДЭУ (1992) і Акадэмію кіравання пры прэзідэнце (2001).

Калтовіч працаваў намеснікам генеральнага дырэктара ў буйных мінскіх крамах: універмагу «Беларусь» і гандлёвым доме «На Нямізе». Быў намеснікам кіраўніка Заводскага раёна Мінска. Узначальваў мінскую гарадскую федэрацыю гандбола.

Адказваў за канфлікт з прадпрымальнікамі Чэрвеньскага рынка

Павялічыць

Найбольш публічнай пасадай у біяграфіі Уладзіміра Калтовіча было намесніцтва старшыні Мінскага гарвыканкама ў часы Мікалая Ладуцькі. Тады сама намеснікам быў Міхаіл Васільеў, якога пасадзілі за хабар.

Уладзімір Калтовіч адказваў за сітуацыю з пераносам Чэрвеньскага рынка. Некаторыя прадпрымальнікі згадвалі яго добрым словам, казалі, каб не Калтовіч, то рынак проста б разагналі, а не перанеслі на іншае месца.

Вуснамі Калтовіча агучвалася рашэнне аб забароне ў Мінску продажу пладова-ягадных напояў, так званага «чарніла». Тады ён сказаў так: «Забарона на рэалізацыю пладова мацаваных вінаў, упэўнены, будзе станоўча ўспрынята мінчукамі, гасцямі сталіцы, і мы, можа быць, паступова адвучым пэўную катэгорыю асоб ад гэтага напою і пяройдзем да лягчэйшых відаў прадукцыі».

Праўда, літаральна праз пару тыдняў Лукашэнка раскрытыкаваў гэтае рашэнне: «Гэтыя забароны нічога талковага не дадуць». І Мінгарвыканкам адкруціў усё назад.

Некалькі разоў за подпісам Калтовіча апазіцыйным актывістам адмаўлялася ў правядзенні вулічных акцый.

Карыстаецца Фэйсбукам і Укантакце

Павялічыць

На Захадзе, ды нават у Расіі ці Украіне, уявіць палітыка ці ўрадоўца без фэйсбука ці твітара сёння фактычна немагчыма. У Беларусі ж чыноўнікі ўсё яшчэ з недаверам ставяцца да сацыяльных сетак. Некаторыя хіба што маюць акаўнт у «Аднакласніках».

Уладзімір Калтовіч у гэтым плане, здаецца, мае іншы падыход. Ён, прынамсі, зарэгістраваны ў фэйсбуку. Адказвае на каментары на сваёй старонцы.

Напрыклад, дырэктар гатэля «Нёман» Міхаіл Малікін, убачыўшы афіцыйны здымак Калтовіча, падтрольвае: маўляў, вадзічку варта было б замяніць на айчынную. Калтовіч адказвае: «Перадам вашу заўвагу масквічам. А можа, адразу дашлі «Нёманскай». Два эшалоны», — знайшоўся што адказаць будучы міністр.

А на іншую заўвагу, калі вяртаецца ў Мінск, 27 лістапада Калтовіч адказаў: «Як Бог дасць».

З фэйсбука можна даведацца, што Калтовіч жанаты ад 17 ліпеня 1992 года. Спіс ягоных сяброў, на жаль, недаступны. А вось фотаздымкі ёсць не толькі афіцыйныя, але і ў нефармальнай абстаноўцы. Падпісаны на суполкі «Мінск турыстычны» і «Гітара.by».

У сацсетцы Укантакце ў Калтовіча толькі адзін сябра, а апошні раз зазіраў туды чыноўнік 10 лістапада. Спадзяемся, што з прызначэннем на адказную пасаду Калтовіч не выдаліцца з сацсетак.

Дзе жыве?

Доўгі час Калтовіч жыў у Чыжоўцы, а з цягам часу займеў трохпакаёўку плошчай 67 м2 на вуліцы Жукоўскага, зусім побач ад праектаванай станцыі метро «Кавальская слабада». У 2000 дом пабудавала долевым спосабам Упраўленне капітальнага будаўніцтва Мінгарвыканкама.

Міністры гандлю за часамі Лукашэнкі:

1. Пятро Казлоў (1995-2001)
2. Аляксандр Кулічкоў (2001-2005)
3. Аляксандр Іванкоў (2005-2009)
4. Валянцін Чаканаў (2009 — 17 снежня 2015)
5. Уладзімір Калтовіч (17 снежня 2015 - да цяперашняга часу)

• 0
• 0
• 0
• 0
• 0
• 0
• 0
• 0