Асцярожна! Мядзведзі ў Беларусі пачалі выходзіць са спячкі раней, чым звычайна
Бурыя мядзведзі ў Беларусі сёлета пачалі выходзіць з зімовай спячкі раней, чым звычайна, паведаміў намеснік дырэктара па навукова-даследчай рабоце ГПУ «Бярэзінскі біясферны запаведнік» Валерый Іўковіч.
«Сёлета бурыя мядзведзі прачнуліся прыкладна на месяц раней, чым звычайна, свежыя сляды самцоў знойдзеныя ўжо ў трох лясніцтвах. Звычайна, калі няма зацяжной зімы, мядзведзі выходзяць са спячкі ў сакавіку», — распавёў Валерый Іўковіч.
Прычынай ранняга абуджэння, хутчэй за ўсё, стала адліга. Так, тэмпература паветра на тэрыторыі запаведніка ў пачатку лютага дасягала 5,6 градуса цяпла, што больш характэрна для красавіка.
«Хутчэй за ўсё, праз адлігу адбылося падтапленне бярлогаў у нізіннай мясцовасці, і жывёлы былі вымушаныя падняцца. Цяпер зноў выпаў снег, сіноптыкі абяцаюць невялікія маразы. Для жывёл ранняе абуджэнне не вельмі камфортнае, але, у прынцыпе, не крытычнае. Самае галоўнае для іх цяпер — знайсці корм, думаю, з гэтым праблем не ўзнікне», — дадаў намеснік дырэктара па навукова-даследчай працы.
Паводле дадзеных Валерыя Іўковіча, у Бярэзінскім запаведніку жывуць каля 35 бурых мядзведзяў. У апошнія гады іх колькасць расце.
Буры мядзведзь занесены ў Чырвоную кнігу Беларусі.
Цяпер чытаюць
Някляеў апублікаваў злабадзённы верш. У ім згадваецца і Калеснікава з Бабарыкам, і Ціханоўская, і Пракоп'еў з Пазняком23
Каментары