Цэнтральны камітэт Беларускай сацыял-дэмакратычнай партыі (Грамада) заклікае Палату прадстаўнікоў разгледзець пытанне фінансавання палітычных партый напярэдадні парламенцкіх выбараў 2016 года.
Як адзначаецца ў рэзалюцыі ЦК БСДП (Грамада), «адсутнасць дзяржаўнай падтрымкі на дзейнасць палітычных партый Беларусі (у тым ліку апазіцыйных) не спрыяе развіццю і выражэнню палітычнай думкі беларускіх грамадзян», а таксама зніжае «ролю і актыўнасць партый у грамадска-палітычным жыцці краіны і не дазваляе больш яскрава прадстаўляць інтарэсы беларусаў».
«Беларусь з’яўляецца для ўсіх нас агульным домам, і грамадзяне, якія жывуць у нашай краіне, плацяць падаткі. За кошт падаткаў фарміруецца бюджэт нашай краіны, утрымліваюцца дзяржаўныя органы ўлады, войска, міліцыя, установы адукацыі і аховы здароўя. Як падаткаплацельшчыкі, беларусы маюць права і на прадстаўніцтва сваіх інтарэсаў палітычнымі партыямі, якія яны падтрымліваюць», — гаворыцца ў рэзалюцыі.
Кіраўніцтва БСДП (Грамада) заклікае дэпутатаў разгледзець пытанне фінансавання палітычных партый, а таксама ўнесці змены ў артыкул 24 «Абмежаванні ў фінансаванні палітычных партый, саюзаў» закона «Аб палітычных партыях», які накладае абмежаванні на фінансаванне палітычных партый з рэспубліканскага і мясцовага бюджэтаў.
Цэнтральны камітэт БСДП (Грамада) прапануе улічыць міжнародны вопыт і правапрымяняльную практыку падчас прапрацоўкі гэтага пытання і заканадаўча замацаваць неабходнасць фінансавай падтрымкі зарэгістраваных палітычных партый незалежна ад іх удзелу ў выбарчых кампаніях.
«ЦК БСДП таксама прапануе вывесці прапорцыю фінансавання палітычных партый у выпадку праходжання іх прадстаўнікоў у Палату прадстаўнікоў і мясцовыя саветы дэпутатаў з улікам колькасці грамадзян, якія пражываюць на тэрыторыі выбарчага ўчастка, дзе перамогу атрымаў прадстаўнік той ці іншай палітычнай сілы. Мы лічым, што прыняцце закона «Аб фінансаванні палітычных партый» істотна паўплывае на развіццё і станаўленне дэмакратыі ў краіне, актывізуе палітычныя працэсы ў публічнай прасторы, а таксама істотна палепшыць вобраз Беларусі на міжнароднай арэне», — адзначаецца ў рэзалюцыі.
Прадстаўнікі БСДП (Грамада) выказваюць гатоўнасць аказаць экспертную дапамогу ў выпрацоўцы гэтага закона.
Цяпер чытаюць
Беларуска кліча на вяселле зорку «Універа», які за вайну. Упрэгся ўвесь Threads7
Каментары