Калегі пра неадэквата з нажом, які ледзь не забіў 4-гадовую дзяўчынку і яе бабулю: «Раніцай анекдоты расказваў, а пасля абеду такое вырабіў»

Сталі вядомыя падрабязнасці рэзананснага злачынства ў Савецкім раёне Гомеля, у выніку якога пацярпелі 56-гадовая бабуля і яе 4-гадовая ўнучка.

Нагадаем, 15 сакавіка сярод белага дня 26-гадовы гамяльчанін, цалкам распрануўшыся, увайшоў у пад'езд дома на вуліцы Дзяржынскага, 1а. Ён пачаў торгаць дзвярныя ручкі, і як назло адныя дзверы аказаліся не замкнутымі. Прайшоўшы на кухню, мужчына схапіў нож і напаў на гаспадыню кватэры і яе чатырохгадовую ўнучку. На крыкі прыбег сусед, які абяззброіў незнаёмца, выклікаў хуткую і міліцыю. Бабуля з унучкай былі дастаўлены ў рэанімацыю. Стан дзяўчынкі стабільны, у лекараў няма боязі за яе жыццё. Жанчына атрымала множныя нажавыя раненні. Гомельскія лекары літаральна выцягнулі яе з таго свету. Пацыентку ўжо перавялі з рэанімацыі ў звычайную палату.

Нападнік тым часам утрымліваецца ў псіхіятрычным шпіталі пад канвоем. Агляд не паказаў наяўнасці ў яго крыві алкаголю, аднак ужо вядома, што падзеям папярэднічаў працяглы запой. У момант здзяйснення злачынства падазраваны павінен быў знаходзіцца не на вуліцы Дзяржынскага, а на прадпрыемстве «Рубін», дзе працуе бляхаром 4 разраду. Ён з'явіўся там раніцай, з'ездзіў з прарабам на аб'ект у Касцюкоўку, вярнуўся на базу і сышоў на абед… Днём раней ён быў у кабінеце дырэктара — пісаў тлумачэньне, чаму не выйшаў на працу 9, 10 і 11 сакавіка.

«Апахмельваўся пасля 8 сакавіка, перабралі. Прачнуўся ў цягніку на Мінск. Доўга шукаў грошы на зваротны шлях. Вярнуўся ў Гомель позна. На працу праспаў, прачнуўся толькі да абеду. Тэлефон разрадзіўся, таму патэлефанаваць не змог», — сцісла выклаў прычыну бляхар.

За прагулы яго пакаралі, але не звольнілі.

— Такія спецыялісты на вуліцы не валяюцца. П'яным ён ніколі не быў заўважаны. Увесь час працаваў на вышыні. Хто чалавека з пахмелля на дах дапусціць? У нас з гэтым вельмі строга, — характарызуе падначаленага дырэктар.

Кіраўніка падтрымлівае прараб:

— Ды якія там падставы?! Ён самы адказны на ўчастку, ды да таго ж двухжыльны. У сезон рамонту дахаў па восем гадзін пад ліхтарамі працаваў. Трэба было, і ў суботу выходзіў. Паралельна адвучыўся на стропальшчыка.

Тое, што здарылася 15 сакавіка на Дзяржынскага, усіх у калектыве шакавала. Ніхто яго ўчынак не апраўдвае. Проста не могуць зразумець, што з іх Жорыкам (так яго называюць па сугуччы з прозвішчам) адбылося. Раніцай жартаваў, анекдоты распавядаў, а пасля абеду такое здзейсніў.

Гарадскім аддзелам следчага камітэта заведзеная крымінальная справа па факце замаху на забойства дзвюх асоб. Праводзіцца шэраг экспертыз, высвятляюцца матывы здзейсненага злачынства.

• 0
• 0
• 0
• 0
• 0
• 0
• 0
• 0