Нацыянальны мастацкі музэй Беларусі дэкляраваў, што ў Міры пачынаецца аднаўленьне княскіх паркаў. І хаця непасрэдна працы пачнуцца толькі ў 2010 годзе, за амбіцыйнасьць і патэнцыйны размах праект ужо ахрысьцілі «беларускім Вэрсалем».
Нацыянальны мастацкі музэй Беларусі дэкляраваў, што ў Міры пачынаецца аднаўленьне княскіх паркаў. І хаця непасрэдна працы пачнуцца толькі ў 2010 годзе, за амбіцыйнасьць і патэнцыйны размах праект ужо ахрысьцілі «беларускім Вэрсалем».
А пакуль ідуць падрыхтоўчыя працы. Як і некалькі стагодзьдзяў таму, для аднаўленьня чароўных паркаў запрошаныя італійцы — дзеля гэтага кіраўніцтва мастацкага музэю адмыслова зьвярнулася ў амбасаду Італіі. Амбасада адгукнулася. Больш за тое, Беларусь ужо наведаў адзін з найлепшых італійскіх ляндшафтных дызайнэраў Паола П’еронэ, які зьяўляецца прэзыдэнтам П’емонцкай акадэміі саду, заснавальнікам Італійскай асацыяцыі архітэктуры пэйзажу.
Пасьля агледзінаў Міру спадар П’еронэ даў згоду на кансультаваньне беларускіх адмыслоўцаў у справе аднаўленьня паркаў. Беларускія адмыслоўцы ўзрадаваліся, бо П’еронэ добра вядомы сваімі бліскучымі паркавымі праектамі ў Францыі, Швайцарыі, Грэцыі ды іншых краінах. Паола П’еронэ дашле свае пісьмовыя рэкамэндацыі па аднаўленьні паркаў, дапаможа з набыцьцём неабходных рэдкіх дрэваў. Наступны раз італійскі паркавы маэстра прыедзе да нас у чэрвені.
Аднаўляцца ў Міры будуць два княскія паркі — так званыя «італійскі» ды «ангельскі». Першы завецца яшчэ «рэгулярным», бо мае дакладнае геамэтрычнае плянаваньне, другі лічыцца «рамантычным», бо тут максымальна захоўваецца некранутасьць прыроды.
«Італійскі» парк быў закладзены яшчэ ў XVII стагодзьдзі, але да сёньня ён цалкам страчаны — аднаўляцца будзе «з нуля». А вось ад «ангельскага», заснаванага 112 гадоў таму, тое‑сёе засталося: некалькі чорных хвояў, дубы, таполі, лістоўніцы. Іх будуць пільна захоўваць, паралельна дадаючы тыя дрэвы, што былі тут ад пачатку. На шчасьце, пра абодва паркі захаваліся даволі падрабязныя зьвесткі.
Дарэчы, рэканструкцыя самога Мірскага замку скончыцца ўжо сёлета. Да яе ёсьць шмат прэтэнзіяў. У праватнасьці, цяпер у замку XVI стагодзьдзя зьявілася падлога з падагрэвам, саўна, ліфт магілёўскай вытворчасьці, плястыкавыя шклопакеты… Аптымісты на гэта гавораць: галоўнае, што замак жыве.
Адноўлены парк аб’яднае замак, а таксама флігель іншага палацу. Гэта малавядомы факт, але апошнія ўладары Міру — князі Сьвятаполк‑Мірскія не жылі ў Мірскім замку, бо ён быў у неналежным стане пасьля некалькіх войнаў. Пад жытло яны збудавалі асобны палац на далёкім беразе возера. Ад яго захаваўся адзін флігель, а таксама лёхі іншага.
Цяпер чытаюць
У расійскай арміі беларускага наёмніка павесілі на дрэве ўніз галавой і білі палкай па геніталіях9
Каментары