Прэм'ер-міністр Ісландыі Сигмюндзюр Давід Гюнлёйгсан сышоў у адстаўку на фоне абвінавачванняў у тым, што ён хаваў сродкі ў афшорнай кампаніі.
Да гэтага моманту Гюнлёйгсан адмаўляўся сыходзіць у адстаўку і нават папрасіў прэзідэнта краіны Оўлавюра Рагнара Грымсана распусціць на фоне скандалу парламент краіны.
У панядзелак каля будынка ісландскага парламента прайшла маштабная акцыя пратэсту супраць прэм'ера, а апазіцыя прыстрашыла выказаць вотум недаверу прэм'еру.
Акрамя таго, петыцыю за адстаўку прэм'ера ў інтэрнэце падпісалі 23 тысячы чалавек. Насельніцтва Ісландыі складае каля 330 тысяч.
Інфармацыя пра тое, што Гюнлёйгсан і яго жонка з'яўляюцца ўладальнікамі афшорнай кампаніі Wintris, з'явілася ў так званых «панамскіх дакументах».
Сам прэм'ер-міністр не задэклараваў гэтыя інвестыцыі, калі ён быў абраны дэпутатам парламента ў 2009 годзе. Праз восем месяцаў ён прадаў 50% кампаніі, якія належалі яму, сваёй жонцы за адзін даляр.
Згодна з дакументам, падпісаным яго жонкай Аннай Сігурлаўн Паўлсдоцір у 2015 годзе, кампанія Wintris інвеставала мільёны даляраў, атрыманых жонкай прэм'ера ў спадчыну.
Гюнлёйгсан заявіў, што не парушаў ніякіх правілаў ці законаў, і што яго жонка на гэтай угодзе нічога не зарабіла.
Цяпер чытаюць
«Я больш не анархіст». Мікола Дзядок — пра турму, Бога і расчараванне ў ідэалогіях32
Каментары