Папа Францішак добраславіў абраз св. Яна Паўла II, прызначаны для аднайменнай мінскай парафіі
Папа Францішак падчас агульнай аўдыенцыі 18 мая на плошчы святога Пятра ў Ватыкане дабраславіў абраз святога Яна Паўла II, які прызначаны для мінскай каталіцкай парафіі, названай яго імем, паведамляе беларуская рэдакцыя Ватыканскага радыё.
Абраз быў добраславёны ў дзень нараджэння святога Яна Паўла II, якому сёння споўнілася б 96 гадоў. Абраз напісала італьянская мастачка Анна Тэдальдэрычоне. Ён уяўляе сабой дакладную копію кананізацыйнага абраза былога пантыфіка.
Мяркуецца, што абраз зойме месца ў цэнтральным алтары пакуль яшчэ не пабудаванага касцёла парафіі, якая носіць імя Яна Паўла II. Распрацаваць праект будучага касцёла пагадзіўся італьянскі архітэктар Джузэпе Сэнпрыні. Цяпер прыхаджане сталічнай парафіі Яна Паўла II дамагаюцца дазволу на будаўніцтва культавага збудавання ў сталічным мікрараёне Брылевічы (Дружба).
«Была першая спроба атрымаць участак, але, на жаль, нам адмовілі, паколькі цяпер у Мінску будуецца шмат касцёлаў, — прыводзіць Ватыканскае радыё словы пробашча парафіі ксяндза Ігара Лашука. — Спадзяюся, крок па кроку мы будзем прасоўвацца, прадставім потым усе неабходныя дакументы. будзем старацца хутчэй арганізаваць парафіяльнае жыццё».
«Я спадзяюся, што святы Ян Павел II заступіцца за нас перад Айцом нябесным, паколькі Мінску сапраўды патрэбныя новыя касцёлы. Мы разумеем, што застаюцца пуставаць касцёлы ў вёсках, дзе мала людзей, нам шкада гэтыя касцёлы, але адбываецца міграцыя ў гарады. У Мінску жыве пятая частка насельніцтва краіны, і тут не толькі дзесяць касцёлаў павінна быць», — лічыць ксёндз.
Цяпер чытаюць
«Цяпер мне чужая сама канцэпцыя ўжыць нешта, чаго ты не ведаеш». Вялікая гутарка з Іванам Шылам пра бізнэс, зараблянне з дапамогай ШІ, жанчын і ботакс1818
Каментары