У Брытаніі пачынаецца галасаванне на рэферэндуме аб тым, ці заставацца краіне ў складзе Еўрапейскага саюза. Участкі для галасавання адкрываюцца а 7 раніцы (09:00 па Мінску) і будуць працаваць да 10-й вечара.
Гэта — усяго трэці агульнанацыянальны рэферэндум у гісторыі Злучанага Каралеўства. Яму папярэднічала бурная агітацыйная кампанія, падчас якой прыхільнікі выхаду Брытаніі з ЕС аб'ядналіся пад лозунгам Vote Leave ( «Галасуй за выхад»), а галоўным лозунгам іх праціўнікаў стаў Remain («Застацца»).
Экзіт-полаў на гэтым рэферэндуме не будзе. Канчатковы вынік павінен быць вядомы да 7 раніцы 24 чэрвеня.
Для ўдзелу ў гэтым рэферэндуме зарэгістраваліся амаль 46,5 мільёна чалавек — рэкордная для брытанскіх выбараў лічба.
Ім трэба будзе паставіць крыжык насупраць аднаго з двух пытанняў у бюлетэні: «Ці павінна Злучанае Каралеўства застацца чальцом Еўрапейскага саюза?» або «Ці павінна Злучанае Каралеўства выйсці з Еўрапейскага саюза?»
Вынік будзе вызначацца на аснове простай большасці - для вызначэння далейшага лёсу Брытаніі аднаму з гэтых пытанняў неабходна набраць 50% плюс адзін голас.
Каментары