Разыходжанні ў суправаджальных дакументах малочнай прадукцыі, вырабленай магілёўскім ААТ «Бабулін глечык», сталі прычынай нядопуску яе на тэрыторыю Расіі.
Як паведаміла сёння ўпраўленне Расспажыўнагляду па Смаленскай і Бранскай абласцях Расіі, 27 жніўня ў пункце папярэдняга паведамлення «Чырвоная Горка» быў забаронены ўвоз у Расійскую Федэрацыю больш за тону малочнай прадукцыі, вырабленай кіруючай кампаніяй холдынгу «Магілёўская малочная кампанія «Бабулін глечык».
«Пры правядзенні ветэрынарнага кантролю ўпраўленнем Рассельгаснагляду па Бранскай і Смаленскай абласцях выяўлена, што фактычная дата вырабу прадукту не адпавядае датам, названым у ветэрынарных сертыфікатах. З чаго вынікае, што груз рухаўся без дакумента, што гарантуе бяспеку малочнай прадукцыі», — адзначаецца на сайце расійскага ведамства.
Там жа адзначаецца, што ў апошні час такога роду парушэнні сталі насіць сістэмны характар. «Упраўленне Рассельгаснагляду мяркуе, што ветэрынарнай службе Рэспублікі Беларусь варта на гэта звярнуць асаблівую ўвагу і прыняць меры для выключэння падобных парушэнняў», — гаворыцца ў паведамленні.
Як паведамілі ў аддзеле знешнеэканамічнай дзейнасці магілёўскага малочнага прадпрыемства, не дапушчаную да рэалізацыі ў Расіі прадукцыю везла не «Бабуліна крынка», а яе контрагент — кампанія «Еўрагандаль». «У іх ёсць прадстаўніцтва ў Расійскай Федэрацыі, і яны займаліся самі перамяшчэннем за мяжу Рэспублікі Беларусь нашай прадукцыі. Але іх ветэрынарны доктар дапусціў памылку ў афармленні суправаджальнага пакета дакументаў. У ветэрынарным пасведчанні ён няправільна пазначыў даты вытворчасці малака», — сказаў прадстаўнік прадпрыемства, адзначыўшы, што ветэрынарны доктар пераблытаў месяц у даце вырабу малака — «па факце там быў жнівень, ён жа паставіў чэрвень».
Па словах работніка «Бабулінага глечыка», не дапушчаная прадукцыя ішла пад гандлёвай маркай «Стары Менск», якая належыць «Еўрагандлю».
Цяпер чытаюць
Масавыя арышты афіцэраў прайшлі на авіябазе ў Мачулішчах — абвінавачваюць у сувязях з апазіцыяй47
Каментары