Новы чарнобыльскі арачны саркафаг, устаноўка якога пачалася 14 лістапада, важыць 36 тысяч тон, мае 108 м у вышыню, 257 м у даўжыню і 162 м у шырыню, піша ВВС.
Яго ўстаноўка ажыццяўляецца пры дапамозе 240 гідраўлічных дамкратаў і зойме каля 40 гадзін чыстага рабочага часу.
Спачатку будаўнікі сабралі канструкцыю саркафага на пляцоўцы непадалёк ад рэактара. Цяпер гэтай канструкцыі трэба пераадолець шлях у 327 метраў, пасля чаго яна павінна цалкам закрыць чацвёрты рэактар станцыі.
Будаўніцтва і ўстаноўку саркафага фінансуе Еўрапейскі банк рэканструкцыі і развіцця.
Эксплуатацыйны тэрмін новага збудавання — каля 100 гадоў. Плануецца, што аб'ект будзе ўведзены ў эксплуатацыю 29 лістапада.
Пасля гэтага спецыялісты пачнуць дэмантаж нестабільных канструкцый старога саркафага і пашкоджанага рэактарнага аддзялення. Гэтыя работы плануюць скончыць да 2023 года.
Міністр экалогіі і прыродных рэсурсаў Украіны Астап Семярак заявіў, што ўзвядзенне арачнай канструкцыі над рэактарам сімвалізуе заканчэнне 30-гадовай барацьбы з наступствамі катастрофы на Чарнобыльскай АЭС.
«Гэта не проста 36 тысяч тон металу. Гэта 36 тысяч тон веры ў поспех, даверу да нашага народа і Украіны», — дадаў гендырэктар АЭС Ігар Граматкін.
Цяпер чытаюць
Пальчыс, Андрэева, Лойка і іншыя імёны — пасля візіту амерыканскіх дыпламатаў у Мінск вызвалілі 250 палітвязняў13
Каментары