Генпракурор Рыгор Васілевіч зрабіў заявы ў справе аб выбуху. Камэнтуе ў сваім блогу Аляксандар Класкоўскі.
У суботу генпракурор Рыгор Васілевіч зрабіў заявы ў справе аб выбуху. Не, нікога не знайшлі. Наадварот, выглядае на тое, што органы цярпяць фіяска.
Калі расшыфраваць эўфэмізмы, то ў выказваньнях можна вылучыць два матывы. Па-першае, гэта рапарт: ня сьпім, стараемся! Па-другое — закамуфляванае выбачэньне.
"Праводзіцца сур'ёзная аналітычная праца ў межах расьследаваньня крымінальнае справы аб выбуху, якая ідзе па ўсёй рэспубліцы, — цытуе Васілевіча "Інтэрфакс". — У такой сытуацыі надзвычай важна прасеяць ды апытаць максымальную колькасьць людзей".
Такім чынам, хлопцаў з колішняга "Белага легіёну", ладную колькасьць іншых апазыцыйных актывістаў, мноства былых сапёраў, хімікаў і зусім ужо выпадковых грамадзян, што трапілі пад мятлу, — проста "прасеялі"?
"Людзі, што затрыманыя ў межах расьследаваньня крымінальнае справы, апытваюцца. Гаворка ня йдзе пра тое, што яны вінаватыя, проста йдзе напружаная праца па раскрыцьці гэтай крымінальнай справы", — тлумачыць Рыгор Васілевіч. Ён лічыць, што грамадзяне мусяць з разуменьнем паставіцца да масавага ахопу "апытаньнямі": "Гэта ўсё выдаткі, калі даводзіцца раскрываць складанае злачынства і трэба хоць за нешта зачапіцца".
Такое ўражаньне, што болей выразных выбачэньняў абураны Сяржук Высоцкі ды іншыя не дачакаюцца.
Што ж да ступені прафесіяналізму доблесных структураў, прадстаўнікам якіх рэгулярна раздаюцца чыны ды ўзнагароды, то высновы настолькі відавочныя, што аўтар гэтых радкоў ня хоча ламацца ў адчыненыя дзьверы. Выбух разьбіў міфы ня толькі пра выспу стабільнасьці, але і пра ўсемагутнасць "органаў". Яны сапраўды налаўчыліся даведвацца, хто пра што шэпчацца ў спальні, але праспалі гром з чыстага неба.
Калі ж браць шырэй, то ўся дзяржаўная машына, наладжаная найперш на здушэньне палітычнай альтэрнатывы, зараз паказвае сябе няздольнай адэкватна рэагаваць на глябальныя выклікі — ад тэрарызму да энэргетычнай крызы. Шасьцерні скрыгочуць, а эфэкту нуль.
Зьвернем увагу яшчэ на адзін акцэнт: "сур'ёзная аналітычная праца ў межах расьследаваньня", як зазначана, "ідзе па ўсёй рэспубліцы". А раптам зламысьнікі (ці дурні яны чакаць як сьвіньня абуха?) даўно ўжо не ў рэспубліцы, а, напрыклад, у імпэрыі?
ЗЫ. Паводле БелаПАНу, генпракурор адмовіўся паведаміць, колькі чалавек увогуле затрымана ў межах справы аб выбуху.
Цяпер чытаюць
Калеснікава: Я не разумею, чаму Еўропа не пачала перамовы з Лукашэнкам раней за ЗША65
Каментары